ஜோர்ஜ் டவுன் – பினாங்கு மாநிலத்தில் மஇகா வழக்கமாகப் போட்டியிடும் இரண்டு சட்டமன்றத் தொகுதிகளில் ஒன்றான பாகான் டாலாம் தொகுதியில் இந்த முறை ஜசெக சார்பில் சதீஸ் முனியாண்டி போட்டியிடுகிறார்.
பினாங்கு துணை முதல்வர் பேராசிரியர் பி.இராமசாமியின் செயலாளராக இதுவரையில் சதீஸ் பணியாற்றி வந்தார்.
கடந்த 2 பொதுத் தேர்தல்களிலும் இந்தத் தொகுதியில் போட்டியிட்டு வென்ற ஏ.தனசேகரனுக்கு இந்த முறை வாய்ப்பு வழங்கப்படவில்லை. அவருக்கு பதிலாகத்தான் சதீஸ் முனியாண்டி நிறுத்தப்படுகிறார்.
இன்று சனிக்கிழமை (21 ஏப்ரல் 2018) காலை பினாங்கு மாநிலத்திற்கான நாடாளுமன்ற, சட்டமன்றத் தொகுதிகளுக்கான ஜசெக வேட்பாளர்களின் பட்டியலை பினாங்கு முதல்வரும், ஜசெக தலைமைச் செயலாளருமான லிம் குவான் எங் அறிவித்தார்.
பினாங்கு மாநிலத்தில் 7 நாடாளுமன்றத் தொகுதிகளிலும், 19 சட்டமன்றத் தொகுதிகளிலும் ஜசெக போட்டியிடுகிறது. வேட்பாளர்களில் ஐவர் பெண்களாவர்.
பாகான் டாலாம் சட்டமன்றத் தொகுதியில் போட்டியிடப் போகும் மஇகா வேட்பாளர் யார் என்பது இதுவரை அறிவிக்கப்படவில்லை.
