சென்னை – ஜெயலலிதாவிற்கு, உடல்நலக்குறைவு ஏற்பட்டு அவர் அப்போலோ மருத்துவமனையில் அனுமதிக்கப்படுவதற்கு முன்பு, போயஸ் கார்டனில் என்ன நடந்தது? என்பதில் சந்தேகம் இருப்பதாக முன்னாள் சபாநாயகரும், அதிமுக தலைவருமான பி.எச்.பாண்டியன் தெரிவித்தார்.
சென்னையில் உள்ள தனது இல்லத்தில் இன்று செவ்வாய்க்கிழமை செய்தியாளர்களைச் சந்தித்த பி.எச்.பாண்டியன் கூறியதாவது:-
“ஜெயலலிதா சுயநினைவில்லாத நிலையில் அப்போலோவில் அனுமதிக்கப்பட்டிருப்பதாகத் தகவல் வந்தது. அங்கு சென்று பார்த்த போது, அவருக்கு சிகிச்சைகள் அளிக்கப்பட்டு வருவதாகத் தெரிவித்தனர். 15 நாட்கள் மருத்துவமனையில் இருந்தேன். சசிகலா குடும்பத்தினரின் முகத்தில் கொஞ்சம் கூட வருத்தம் இல்லை”
“போயஸ் கார்டனில் வாக்குவாதம் முற்றிய நிலையில் ஜெயலலிதா கீழே தள்ளிவிடப்பட்டதாகவும், அவரைத் தூக்கி விடக் கூட யாரும் முன்வரவில்லை என்றும் ஊடகங்கள் கூறுகின்றன. இதில் எனக்கு சந்தேகம் உள்ளது. இதனை விசாரணை செய்ய வேண்டும்” என்று தெரிவித்தார்.
