லாஸ் ஏஞ்சல்ஸ் – இந்த ஆண்டுக்கான ஆஸ்கார் விருதுகளில் ஆச்சரியமான மற்றொரு தேர்வு வாழ்நாள் சாதனையாளர் வரிசையில் கௌரவ ஆஸ்கார் விருது வழங்கப்பட்ட ஜேக்கி சான்.
சினிமா உலகில் சிலர் இருப்பார்கள். கோடிக்கணக்கான டாலர்கள் வசூல் மழை பெய்யும் படங்களில் நடித்திருப்பார்கள் அல்லது தயாரித்தோ, இயக்கியோ இருப்பார்கள். சினிமாவின் வளர்ச்சிக்குப் பெரும் பங்களிப்பை ஆற்றியிருப்பார்கள். ஆனால், வணிக ரீதியாகவே சினிமாவில் இயங்கும் அவர்களுக்கு ஆஸ்கார் கிடைக்க வாய்ப்பே இல்லை.
கடந்த 12 நவம்பர் 2016-இல் நடைபெற்ற சிறப்பு விழாவில் வாழ்நாள் சாதனையாளர் கௌரவ ஆஸ்கார் விருது ஜேக்கி சானுக்கு வழங்கப்பட்டது….(படம் நன்றி:ஜேக்கி சான் இணையப் பக்கம்)
இவர்களைப் போன்றவர்களைத் தேர்ந்தெடுத்து ஆஸ்கார் அகாடமி, ஆஸ்கார் விருதளிப்பு விழாவுக்கு சில மாதங்களுக்கு முன்னால் நடைபெறும் ஆஸ்கார் கவர்னர்களுக்கான (annual Governors Awards) விருந்து வைபவத்தில் இந்த வாழ்நாள் சாதனையாளர் விருதுகளை வழங்கும்.
கடந்த ஆண்டு நவம்பரில் வாழ்நாள் சாதனையாளர் வரிசையில் கௌரவ ஆஸ்கார் விருது வழங்கப்பட்டபோது, மகிழ்ச்சியில் திளைக்கும் ஜேக்கி சான்…(படம் நன்றி: இன்ஸ்டாகிராம்)
அந்த வகையில் 2017-ஆம் ஆண்டுக்கான ஆஸ்கார் வாழ்நாள் சாதனையாளர் விருது ஜேக்கி சானுக்கு கடந்த நவம்பர் 12-ஆம் தேதி ஒரு விருந்து வைபவத்தில் வழங்கப்பட்டது. அதனை முன்னிட்டு, கடந்த ஞாயிற்றுக்கிழமை பிப்ரவரி 26-ஆம் தேதி நடைபெற்ற ஆஸ்கார் விருதளிப்பு விழாவில் கலந்து கொண்டார் ஜேக்கி சான்.
ஆஸ்கார் சிவப்புக் கம்பள வரவேற்பில் ஜேக்கி சான் – அவர் கையில் வைத்திருப்பது பாண்டா கரடி பொம்மைகள். சீனாவின் பாண்டா கரடிகளைப் பாதுகாக்கும் இயக்கத்தின் தூதுவராகவும் செயல்படும் ஜேக்கி சான், பாண்டா கரடிகளின் முக்கியத்துவத்தை உணர்த்தும் விதத்தில் எங்கு சென்றாலும், இரண்டு பாண்டா பொம்மைகளை எடுத்துச் செல்கின்றார்…
ஜேக்கி சான் இதுவரை 250 படங்களில் பங்கு கொண்டிருக்கிறார். குழந்தை நட்சத்திரமாகவும் பல படங்களில் நடித்திருக்கும் அவர், பின்னர் துணை நடிகராகவும், சண்டைக் காட்சி நடிகராகவும், சண்டைக் காட்சிகள் அமைப்பவராகவும், கதாநாயகனாகவும் தயாரிப்பாளராகவும், இயக்குநராகவும் பணியாற்றியிருக்கின்றார்.
அண்மையில் சீனப் பெருநாளை முன்னிட்டு வெளியான ஜேக்கி சானின் ‘குங்பூ யோகா’ திரைப்படத்தின் விளம்பர நிகழ்ச்சி இந்தியாவில் நடத்தப்பட்டபோது, அப்படத்தில் வில்லனாக நடித்த சோனு சூட், மற்றும் யோகாவில் தேர்ச்சி பெற்ற இந்திய நடிகை ஷில்பா நடிகை ஆகியோருடன் ஜேக்கி சான்….
குங்பூ யோகா படத்தின் கதாநாயகி டிஷா பட்டாணியுடன் ஜேக்கி சான்…
நமது நாட்டின் மாமன்னரிடமிருந்து ‘டத்தோ’ விருது ஜேக்கி சான் பெற்ற போது….
மலேசிய மாமன்னரிடமிருந்து ‘டத்தோ’ விருதும் வழங்கிச் சிறப்பிக்கப்பட்டவர் ஜேக்கி சான். 2015-ஆம் ஆண்டில் கூட்டரசுப் பிரதேச தினத்தை முன்னிட்டு டத்தோ விருதை ஜேக்கி சான்னுக்கு நமது மாமன்னர் வழங்கி கௌரவித்தார்.
மலேசியாவில் ஜேக்கி சான்னின் பல படங்களின் படப்பிடிப்பு நடந்திருக்கின்றது. ஜேக்கி சான்னின் பல படங்களில் மலேசியாவும் ஒரு களமாகக் காட்டப்பட்டிருக்கின்றது.
-செல்லியல் தொகுப்பு
