புதுடில்லி, ஏப்ரல் 25 – சர்வதேச நாடுகளின் காபி ஏற்றுமதி, சென்ற பிப்ரவரி மாதத்தில், 4.3 சதவீதம் வளர்ச்சி கண்டுள்ளது. இதன் மூலம் ஏற்றுமதியாகும் காபி மூட்டைகளின் எண்ணிக்கை 9 மில்லியனை எட்டியுள்ளது. கடந்தாண்டில் இதே மாதத்தில், சர்வதேச காபி ஏற்றுமதி, 8. 62 மில்லியன் மூட்டைகளாக இருந்தது என ‘சர்வதேச காபி கூட்டமைப்பு’ (International Coffee Organisation) தெரிவித்துள்ளது.
இந்த வளர்ச்சியினைத் தொடர்ந்து, வியட்னாமில் காபி ஏற்றுமதி, 28.2 சதவீதம் அதிகரித்துள்ளது. இருப்பினும், நடப்பு 2013 – 14ம் சந்தை பருவத்தின் முதல் ஐந்து மாதங்களில், வியட்னாமின் காபி ஏற்றுமதி, 7.3 மில்லியன் மூட்டைகளாக சரிவடைந்து உள்ளது.
பிரேசிலின் காபி உற்பத்தியில் நிலையற்ற சூழல் நிலவுவதால், சர்வதேச அளவில் இதன் விலை, ஏற்ற, இறக்கத்துடன் காணப்படுகிறது. சென்ற பிப்ரவரியில், பிரேசிலின் காபி ஏற்றுமதி, 2.7 மில்லியன் மூட்டைகளாக உயர்ந்திருந்தது.
உலகளவில் காபி ஏற்றுமதியில் மூன்றாவது மிகப்பெரிய நாடாக திகழும், இந்தோனேஷியாவின் காபி ஏற்றுமதி, கணக்கீட்டு மாதத்தில், 0.23 மில்லியன் மூட்டைகளாக வீழ்ச்சி கண்டு உள்ளது. இது கடந்தாண்டின் இதே மாதத்தில், 0.71 மில்லியன் மூட்டைகளாக அதிகரித்து காணப்பட்டது.
இதே போன்று, இந்தியாவின் காபி ஏற்றுமதியும், 0.59 மில்லியன் மூட்டைகளிலிருந்து, 0.56 மில்லியன் மூட்டைகளாக சரிவடைந்துள்ளது. மதிப்பீட்டு மாதத்தில், ஒட்டு மொத்த காபி ஏற்றுமதியில், அராபிகா வகை காபியின் பங்களிப்பு, 5.4 மில்லியன் மூட்டைகளிலிருந்து, 5.7 மில்லியன் மூட்டைகளாக வளர்ச்சியும், ரோபஸ்டா வகை காபி, 3.25 மில்லியன் மூட்டைகளிலிருந்து, 3.16 மில்லியன் மூட்டைகளாக வீழ்ச்சியும் அடைந்துள்ளது.
கடந்தாண்டில், சர்வதேச அளவில் காபி உற்பத்தி, 9.8 சதவீதம் (145.24 மில்லியன் மூட்டைகள்) வளர்ச்சி கண்டிருந்தது குறிப்பிடத்தக்கது.
