மும்பை,மே 17 – ஐபிஎல் கிரிக்கெட்டில் சூதாட்டம் தொடர்பாக ராஜஸ்தான் ராயல்ஸ் அணியை சேர்ந்த வேகப்பந்து வீச்சாளர் ஸ்ரீசாந்த் உட்பட 3 வீரர்களை டெல்லி போலீசார் நேற்று இரவில் அதிரடியாக கைது செய்தனர்.
ஐ.பி.எல் சூதாட்ட புகாரில் சிக்கியுள்ள கிரிக்கெட் வீரர்கள் ஸ்ரீசாந்த், அஜித் சந்த்லியா மற்றும் அங்கீத் சவான் ஆகிய 3 வீரர்களைத் தவிர வேறு எந்த ஒரு அணியின் உரிமையாளருக்கோ, வீரர்களுக்கோ சூதாட்டத்தில் தொடர்பு இல்லை என்று டெல்லி போலீஸ் விளக்கமளித்துள்ளது.
அவர்களுடன் 7 முகவர்களும் கைது செய்யப்பட்டுள்ளனர். ஐபிஎல் டி20 கிரிக்கெட் போட்டிகள் கடந்த ஏப்ரல் மாதம் தொடங்கி நடைபெற்று வருகிறது.
இதில் சென்னை சூப்பர் கிங்ஸ், மும்பை இந்தியன்ஸ், பெங்களூர் ராயல் சேலஞ்சர்ஸ், ஐதராபாத் சன் ரைசர்ஸ், ராஜஸ்தான் ராயல்ஸ், கொல்கத்தா நைட் ரைடர்ஸ், பஞ்சாப் கிங்ஸ் லெவன், புனே வாரியர்ஸ், டெல்லி டேர்டெவில்ஸ் என 9 அணிகள் விளையாடி வருகின்றன.
தற்போது இந்த அணிக்கு இடையே லீக் போட்டிகள் நடைபெற்று வருகிறது.
