சென்னை – ஜெயம் ரவியும் லட்சுமி மேனனும் முதல் முறையாக இணையும் படத்திற்கு ‘மிருதன்’ என்று பெயர் சூட்டியிருக்கிறார்கள்.
இப்படத்தைத் தேமுதிக-வின் அதிருப்தி சட்டமன்ற உறுப்பினரான மைக்கேல் ராயப்பனின் ‘குளோபல் இன்ஃபோடெயின்மெண்ட்’ நிறுவனம் தயாரிக்கிறது.
இந்நிறுவனம் ஏற்கனவே நாடோடிகள்,மாயாண்டி குடும்பத்தார்,சிந்து சமவெளி, கோரிப்பாளையம், பட்டத்து யானை உட்பட பல படங்களைத் தயாரித்துள்ளது.
இந்தப் படத்தை நாணயம், நாய்கள் ஜாக்கிரதை ஆகியபடங்களை இயக்கிய சக்தி சௌந்தர்ராஜன் இயக்குகிறார். வடகறி படத்துக்கு ஒளிப்பதிவு செய்த எஸ்.வெங்கடேஷ் ஒளிப்பதிவு செய்கிறார்.
இசை டி.இமான்; பாடல்கள் மதன் கார்க்கி.
மிருதன் படத்தின் முதல் கட்டப் படப்பிடிப்பு ஊட்டியில் 30 நாட்கள் நடைபெற்று முடிந்தது.
அடுத்த கட்டப் படப்பிடிப்பு இம்மாதம் 18-ஆம் தேதி சென்னையில் துவங்குகிறது. அதைத் தொடர்ந்து ஐதராபாத்திலும் படப்பிடிப்பு நடைபெற உள்ளது.
தொடர்ச்சியாகப் படப்பிடிப்பு நடத்தி, அக்டோபர் மாத இறுதிக்குள் முழுப் படத்தையும் முடிக்கத் திட்டமிட்டுள்ளதாகக் கூறப்படுகிறது.
