மணிலா – பிலிப்பைன்ஸ் அதிபர் டூடெர்டேவின் உத்தரவின் படி, அபு சயாப் தீவிரவாத இயக்கத்தை மொத்தமாக அழிக்கப் புறப்பட்டிருக்கிறது பிலிப்பைன்ஸ் காவல்துறை.
அபு சயாப் இயக்கத்தினரை உயிருடனோ அல்லது பிணமாகவோ பிடித்துக் கொடுப்பவர்களுக்கு பிலிப்பைன்ஸ் மதிப்பில் 1 மில்லியன் வரை பரிசாகக் கொடுக்கவிருப்பதாக டூடெர்டே அறிவித்திருக்கிறார்.
இதனையடுத்து, பிலிப்பைன்ஸ் தேசியக் காவல்துறையின் தலைமை இயக்குநர் ரோனால்ட் “பத்தோ” டேலா ரோசா தலைமையிலான காவல்துறைப் படைப் பிரிவு, தீவிரவாதிகள் பதுங்கியிருப்பதாக நம்பப்படும் போஹோல் பகுதியில் தேடுதல் வேட்டையில் இறங்கியிருக்கிறது.
இந்நிலையில், அண்மையில் அபு சயாப்பின் முக்கியத் தலைவன் அபு ராமி சுட்டுக் கொல்லப்பட்ட இடத்தைப் பார்வையிட்ட பின் செய்தியாளர்களிடம் பேசிய ரோனால்ட், அபு சயாப் இயக்கத்திற்கு நாள் நெருங்கிக் கொண்டிருப்பதாகவும், விரைவில் மொத்தமாக அழிக்கப்படுவார்கள் என்றும் எச்சரிக்கை விடுத்தார்.
