புத்ராஜெயா: மின்சாரம், அறிவியல், தொழில்நுட்பம், சுற்றுச்சூழல் மற்றும் பருவநிலை மாற்றம் (MESTECC) அமைச்சின் மூலமாக, அரசாங்கம் வறிய நிலைக் குடும்பங்களுக்கு 40 ரிங்கிட் மின்சாரக் கட்டணத் தள்ளுபடி திட்டத்திற்காக, 80 மில்லியன் ரிங்கிட்டை ஒதுக்கியுள்ளது. இகசெ (eKasih) திட்டத்தில் பதிந்துள்ளவர்களுக்கு ஜனவரி 1-ம் தேதி முதல் இந்த நடைமுறை செயல்படுத்தப்படும் எனத் தெரிவிக்கப்பட்டுள்ளது.
இம்மாதம் காலாவதியாக இருக்கும் 20 ரிங்கிட் மின்சாரக் கட்டணத் தள்ளுபடி திட்டத்திற்கு, மாற்று திட்டமாக, இத்திட்டம் ஜனவரி 1-ஆம் தேதி முதல் டிசம்பர் 31-ஆம்தேதிவரையிலும் நடைமுறையில் இருக்கும் என அறிக்கைஒன்றின் வாயிலாக அமைச்சு தெரிவித்தது.
நவம்பர் 2-ஆம் தேதி, 2019-ஆம் ஆண்டுக்கான வரவு செலவுத் திட்டத்தில் குறிப்பிட்டபடி, மக்கள் நலன் மற்றும் வாழ்க்கைத் தரத்தில் அக்கறை உள்ளதை உணர்த்தும் பொருட்டில் இத்திட்டம் செயல்படுத்தப்படுகிறது என குறிப்பிடப்பட்டிருந்தது.
இது தொடர்பான மேல் விபரங்களுக்கு, அரசாங்கம், மின்சாரம், அறிவியல், தொழில்நுட்பம், சுற்றுச்சூழல் மற்றும் பருவநிலை மாற்றம் (MESTECC) அமைச்சின் அகப்பக்கத்தில், https://semakanrebat.mestecc.gov.my சரிபார்க்கலாம், அல்லது 03-8000 8000 என்ற எண்ணில் அரசு அழைப்பு மையத்தை (MyGCC) தொடர்பு கொள்ளலாம்.
