கிள்ளான்: சிலாங்கூர் நம்பிக்கைக் கூட்டணி அரசாங்கத்திற்கு ஆதரவளிப்பதாகக் கூறிய நான்கு சிலாங்கூர் பெர்சாத்து சட்டமன்ற உறுப்பினர்களில் ஒருவர் அவரது நிலைப்பாட்டை பின்வாங்கியதாகத் தெரிகிறது.
டெங்கில் சட்டமன்ற உறுப்பினர் அதிப் சியான் அப்துல்லா, முகமட் சைட் ரோஸ்லி (ஜெராம்), சல்லேஹுடின் அமிருடின் (குவாங்) மற்றும் ஹருமெய்னி உமர் (பாதாங் காளி) ஆகியோருடன் பெர்சாத்துக்கு ஆதரவாக மாநில அரசுக்கு ஆதரவு அளிப்பதாக மந்திரி பெசார் டத்தோஸ்ரீ அமிருடின் ஷரிக்கு சத்தியப் பிரமானத்தை சமர்ப்பித்திருந்தனர்.
இருப்பினும், சிலாங்கூர் பெர்சாத்து இளைஞர் தலைவரான அதிப், தனது மூன்று நம்பிக்கைக் கூட்டணி நட்பு சகாக்களிடமிருந்து தன்னை ஒதுக்கிவைத்ததாக கூறப்படுகிறது.
“தம்மை இந்த குழுவிலிருந்து நீக்குவதன் மூலம் அவர் அதை தெளிவுபடுத்தியுள்ளார். அவர் இப்போது தேசிய கூட்டணியை நோக்கி நகர்ந்துள்ளதை நாம் காணலாம்.” என்று கோலா சிலாங்கூர் பெர்சாத்து தலைவர் முகமட் சைட் கூறினார்.
சல்லேஹுடின் மற்றும் ஹருமெய்னி ஆகியோர் தொடர்ந்து நம்பிக்கைக் கூட்டணியுடன் நட்புடன் இருப்பார்கள் என்று முகமட் சைட் கூறினார்.
“நாங்கள் பொதுத் தேர்தலில் நின்றபோது, நாங்கள் அனைவரும் புதிய முகங்களாக இருந்தோம். எங்கள் தொகுதிகளில் எங்களை அறியவில்லை. நாங்கள் நம்பிக்கைக் கூட்டணியின் கீழ் போட்டியிட்டதால் அவர்கள் எங்களுக்கு வாக்களித்தனர். எனவே எங்கள் பதவிக்காலம் முடியும் வரை நாங்கள் ஒரே பதாகையின் கீழ் பணியாற்றுவது நியாயமானது. “என்று முகமட் சைட் கூறினார்.
அடுத்த பொதுத் தேர்தலில் எந்தக் கட்சி அல்லது கூட்டணிக்கு வாக்களிக்க வேண்டும் என்பதை வாக்காளர்கள் தீர்மானிக்க வேண்டும் என்று அவர் கூறினார்.
“அதுவரை, கடந்த பொதுத் தேர்தலின் போது எங்களுக்கு வழங்கப்பட்ட ஆணைப்படி நாங்கள் அவர்களுக்கு சேவை செய்வோம்.” என்று அவர் மேலும் கூறினார்.
