கோலாலம்பூர், டிச 05 – 13 வது பொதுத்தேர்தலில் தேசிய முன்னணியின் வெற்றியை எதிர்கட்சிகள் ஏற்றுக்கொள்ள மறுப்பது குறித்து பிரதமர் நஜிப் துன் ரசாக் சாடியுள்ளார்.
அத்துடன் தனது வெற்றியை எதிர்கட்சித் தலைவர் அன்வாரோடு ஒப்பிட்டு ஒரு பூப்பந்தாட்ட விளையாட்டு போல் வர்ணித்துள்ளார்.
முதல் சுற்றில் நஜிப் 21 – 15 என்ற கணக்கில் வெற்றி பெற்றார், இரண்டாவது சுற்றில் நஜிப் 5-21 என்ற கணக்கில் தோல்வியுற்றார். மூன்றாவது சுற்றில் நஜிப் 21 – 16 என்ற கணக்கில் வெற்றிபெற்றார். விளையாட்டு விதிமுறைகளின் படி, நஜிப் வெற்றியடைந்தார். ஆனால் அன்வார் தான் 57 புள்ளிகள் பெற்றுள்ளதாகவும், நஜிப் 47 புள்ளிகள் தான் பெற்றார் என்றும் கூறி போராட்டம் செய்கிறார்” என்று நஜிப் இன்று அம்னோ பொதுக்கூட்டத்தில் தெரிவித்தார்.
“நம்மிடம் முறை இருக்கிறது. நாம் விளையாடுகிறோம். யார் பெரும்பான்மையோ அவர்கள் வெற்றியடைகிறார்கள்” என்றும் நஜிப் குறிப்பிட்டார்.
தேசிய முன்னணி 9 மாநிலங்களில் பெரும்பான்மை வாக்குகளைப் பெற்றுள்ளது. ஆனால் பக்காத்தான் 4 மாநிலங்களில் தான் பெரும்பான்மை வாக்குகளைப் பெற்றுள்ளது என்றும் நஜிப் தெரிவித்தார்.
“உண்மையில் இந்த போட்டியே ஏற்றுக்கொள்ள முடியாது. காரணம் எதிர்கட்சிகள் 3 விதமான சின்னங்களுடன், சிந்தனைகளுடன் களமிறங்கினார்கள். ஆனால் அம்னோ ஒரே ஒரு சின்னத்துடன் களமிறங்கி அதிக வாக்குகளை அடைந்தது. அப்படி பார்த்தால் அம்னோ தான் அதிக பெரும்பான்மை வாக்குகளைப் பெற்றுள்ளது” என்றும் நஜிப் கூறினார்.
