பெட்டாலிங் ஜெயா, ஜூன் 18 – வர்த்தகம் செய்ய சிறந்த நாடுகளாக கருதப்படும் 82 நாடுகளின் தரவரிசைப் பட்டியலில் மலேசியாவிற்கு 19 -வது இடம் கிடைத்துள்ளது.
2014 -ம் ஆண்டு முதல் 2018 -ம் ஆண்டு வரையிலான காலகட்டத்தில், வர்த்தகம் செய்ய ஏதுவான 20 நட்பு நாடுகளின் பட்டியலிலும் மலேசியா இடம் பிடித்துள்ளது.
இந்த தகவல், ‘தி இக்னாமிஸ்ட் இன்டெலிஜென்ஸ் யூனிட்’ (இஐயூ) அண்மையில் வெளியிட்ட வர்த்தகச் சூழ்நிலை தரவரிசை பட்டியலில் குறிப்பிடப்பட்டுள்ளது.
கடந்த 2009 முதல் 2013 வரையிலான காலகட்டத்தில், 24 -வது இடத்தில் இருந்து மலேசியா, தற்போது 5 இடங்கள் முன்னேறி, பிரிட்டிஷ் கூட்டரசு, பிரான்ஸ், தென் கொரியா, ஜப்பான் ஆகிய நாடுகளை பின்னுக்குத் தள்ளியது. எனினும், நாடுகளுக்கான பிராந்திய தரவரிசையில், ஏற்கனவே இருந்த 6 வது இடத்திலேயே மலேசியா உள்ளது குறிப்பிடத்தக்கது.
அண்டை நாடான சிங்கப்பூர், கடந்த 2009 – 2013 -ம் ஆண்டில் இருந்த முதலிடத்தை, மீண்டும் தக்க வைத்துள்ளது. அத்துடன் அடுத்த 5 ஆண்டுகளுக்கு அந்நிய முதலீட்டிற்கு சிறந்த இடமாகவும் சிங்கப்பூர் தொடர்ந்து விளங்கும் என்றும் கருதப்படுகின்றது.
