Home One Line P1 2012-இல் அகால்புடி அறக்கட்டளை இயக்குனரை சாஹிட் பதவி விலக உத்தரவிட்டார்!

2012-இல் அகால்புடி அறக்கட்டளை இயக்குனரை சாஹிட் பதவி விலக உத்தரவிட்டார்!

167
0
SHARE

கோலாலம்பூர்: எந்த ஒரு காரணங்களும் தெரிவிக்கப்படாத நிலையில் கடந்த 2012-இல், அகால்புடி அறக்கட்டளையின் முன்னாள் இயக்குனர் பேராசிரியர் டாக்டர் சுல்கிப்ளி செந்தெரி, அறக்கட்டளையின் இயக்குனர் பதவியிலிருந்து விலகக் கோரி அகமட் சாஹிட் ஹமீடி உத்தரவிட்டதாக நீதிமன்றத்தில் இன்று வியாழக்கிழமை தெரிவித்தார். 

பதவி விலகல் கடிதத்தை அகமட் சாஹிட் ஹமீடியின் ஓட்டுநரால் தம்மிடம் ஒப்படைக்கப்பட்டதாகத் தெரிவித்தார். சாஹிட் ஹமீடி அப்போது துணை பிரதமராகவும், அறக்கட்டளையின் அறங்காவலராகவும் இருந்ததாக அவர் கூறினார்.

நான் ஏன் பதவி விலக வேண்டும் என்று என்னிடம் கூறப்படவில்லை. நான் இந்த வழிமுறைகளை மட்டுமே ஏற்றுக்கொண்டேன். ஏனென்றால் அகால்புடி அறக்கட்டளையின் பயணம் மற்றும் நடவடிக்கைகள் குறித்து எனக்கு நேரடி ஈடுபாடும் அறிவும் இல்லை,” என்று அவர் கூறினார்.

சாஹிட் ஹமீடி வழக்கில் ஏழாவது சாட்சியாக கோலாலம்பூர் உயர்நீதிமன்ற நீதிபதி கொலின் லாரன்ஸ் செக்குவேரா முன் எழுதப்பட்ட அறிக்கையை வாசிக்கும் போது அவர் இவ்வாறு கூறினார்.

அப்பொறுப்பை ஏற்றதிலிருந்து, கடந்த 2012-இல் அவர் பதவி விலகும் வரையில், அவர் சம்பந்தப்பட்ட எந்த அடித்தள நடவடிக்கைகளும் கூட்டங்களும் நடைபெறவில்லை என்றும், அவருக்கு எந்தவிதமான கொடுப்பனவும்  கிடைக்கவில்லை என்றும் கூறினார்.

அந்த நேரத்தில், அவர் ஒருபோதும் வருடாந்திர கூட்டங்களை நடத்தவில்லை என்றும், சாஹிட் ஹமீடியுடன் அறக்கட்டளையின் செயல்பாடுகள் மற்றும் செலவுகள் குறித்து விவாதிக்கவில்லை என்றும் கூறினார். மேலும் அறக்கட்டளையின் நிதி அறிக்கைகள் ஒருபோதும் தம் பார்வைக்கு குறிப்பிடப்படவில்லை என்றும் அவர் கூறினார்.

அறக்கட்டளையின் நிதிகளின் ஆதாரம் குறித்து தனக்கு ஒருபோதும் சாஹிட் ஹமீடி அறிவிக்கவில்லை என்றும், அறக்கட்டளையின் நிர்வாகம் மற்றும் செயல்பாடுகள் தொடர்பான எந்த ஆவணங்களிலும் அல்லது கடிதங்களிலும் ஒருபோதும் தாம் கையெழுத்திடவில்லை என்றும் சுல்கிப்ளி கூறினார். அறக்கட்டளைக்கு சொந்தமான காசோலைகள் போன்ற எந்த நிதி ஆவணங்களிலும் தாம் கையெழுத்திடவில்லை என்றும் அவர் கூறினார்.

நான் இயக்குநராக இருக்கும் வரை, அகால்புடி அறக்கட்டளை கணக்கு தணிக்கை செய்யப்பட்டதா இல்லையா என்பது எனக்குத் தெரியாது. அகால்புடி அறக்கட்டளையின் இயக்குநராக நான் பணியாற்றிய காலத்தில், அகால்புடி அறக்கட்டளைக்கு பல மில்லியன் ரிங்கிட் நிதி உள்ளது என்பது எனக்குத் தெரியாது,” என்றும் அவர் கூறினார்.

Comments