சென்னை – தமிழக சட்டமன்றத்தில் நேற்று அமளியில் ஈடுபட்ட, எதிர்கட்சித் தலைவர் மு.க.ஸ்டாலின் உட்பட 80 திமுக உறுப்பினர்கள், வலுக்கட்டாயமாக அவையிலிருந்து வெளியேற்றப்பட்டனர்.
இந்நிலையில், நேற்றைய கூட்டத்தில் பங்கேற்காத, திமுக தலைவர் மு.கருணாநிதி உட்பட 9 திமுக உறுப்பினர்கள், சட்டமன்றத்தில் கலந்து கொள்ளத் தடையில்லை என்று அறிவிக்கப்பட்டுள்ளது.
அதன்படி கருணாநிதி (திருவாரூர்) கே.என்.நேரு(திருச்சி மேற்கு), ஆர் காந்தி (ராணிப்பேட்டை), பூங்கோதை(ஆலங்குளம்), ஐ.பெரியசாமி(ஆத்தூர்), எம்-ஆர்.கே.பன்னீர்செல்வம் (குறிஞ்சிப்பாடி), எம்.கே.மோகன்(அண்ணா நகர்) க.அன்பழகன்(கும்பகோணம்), ம.ராமச்சந்திரன்(ஒரந்தநாடு) உள்ளிட்ட 9 பேர் சட்டமன்றக் கூட்டத்தொடரில் பங்கேற்பதற்கு எந்த தடையும் இல்லை என அதிகாரிகள் தெரிவித்துள்ளனர்.
இதனிடையே, சட்டமன்றத்தில் இருந்து திமுக எம்எல்ஏக்கள் இடை நீக்கம் செய்யப்பட்டதற்கு எதிர்ப்பு தெரிவித்து சென்னையில் வரும் 22ம் தேதி (திங்கட்கிழமை) திமுக சார்பில் கண்டனப் பொதுக்கூட்டம் நடைபெறும் என எதிர்க்கட்சி தலைவர் மு.க.ஸ்டாலின் தெரிவித்துள்ளார்.
