கோலாலம்பூர் – கடந்த சனிக்கிழமை நடைபெற்ற பெர்சாத்து கட்சியின் முதல் ஆண்டுப் பொதுக்கூட்டம், கட்சியின் அரசியலமைப்புக்கு உட்பட்டு நடக்கவில்லை என்றும், அதனை உடனடியாக விசாரணை செய்யும் படியும் சங்கங்களின் பதிவிலாகாவிற்கு வலியுறுத்தப்பட்டிருக்கிறது.
தெமெர்லோ பெர்சாத்து தொகுதித் தலைவர் அமெரஸ் சே ஆன் இது குறித்துக் கூறுகையில், “சனிக்கிழமை நடைபெற்ற பொதுக்கூட்டம் சில தரப்பினரின் பிரச்சினைகளைப் பற்றி பேச தன்மூப்பாக நடத்தப்பட்ட ஒன்றாகவே தோன்றியது. கட்சியின் பிரச்சினைகளைப் பற்றி பேச அக்கூட்டத்தில் எந்த முன்னெடுப்பும் எடுக்கப்படவில்லை” எனத் தெரிவித்திருக்கிறார்.
மேலும், “ஆண்டுப் பொதுக்கூட்டத்தில் பேராளர்கள் யாரும் கட்சியின் அரசியலமைப்புக்குட்பட்டு தேர்வு செய்யப்படவில்லை. அங்கு எந்த ஒரு கிளை மற்றும் தொகுதி அளவிலான பேச்சுவார்த்தையும் நடத்தப்பட்டு, அதன் மூலம் முதல் ஆண்டுக்கூட்டத்தின் பேராளர்கள் தேர்வு செய்யப்படவில்லை. அதுமட்டுமின்றி இளைஞர் மற்றும் மகளிர் கிளைகளின் கூட்டம் நடைபெறவில்லை.”
“நான் ஏமாற்றப்பட்டது போலும், வேடிக்கையாக நடத்தப்பட்டது போலும் உணர்ந்தேன். அதனால் தான் இந்த விவகாரத்தில் ஆர்ஓஎஸ் நடவடிக்கை எடுக்க வேண்டுமெனக் கூறினேன்” என சங்கங்களின் பதிவிலாகாவில் புகார் அளித்த பின் அமரெஸ் செய்தியாளர்களிடம் தெரிவித்தார்.
