மாஸ்கோ – (மலேசிய நேரம் ஜூன் 23 பின்னிரவு 1.00 மணி நிலவரம்) நைஜீரியாவின் அகமட் மூசா ஐஸ்லாந்துக்கு எதிரான ஆட்டத்தில் இரண்டாவது கோலை 75-வது நிமிடத்தில் அடித்ததைத் தொடர்ந்து நைஜீரியா 2.0 என்ற கோல் எண்ணிக்கையில் ஐஸ்லாந்தை வெற்றி கொண்டது.
வெள்ளிக்கிழமை (ஜூன் 22) நடைபெற்ற உலகக் கிண்ணப் போட்டிகளுக்கான இரண்டாவது ஆட்டத்தில் ஐஸ்லாந்தும் நைஜீரியாவும் மோதின.
‘டி’ பிரிவுக்கான இந்த ஆட்டத்தின் முதல் பாதியில் இரண்டு குழுக்களுமே கோல்கள் அடிக்க முடியாமல் திணறின.
எனினும் இரண்டாவது பாதி ஆட்டம் தொடங்கியதும் சில நிமிடங்களிலேயே – ஆட்டத்தின் 49-வது நிமிடத்தில் – நைஜீரியாவின் அகமட் மூசா ஒரு கோல் அடித்து நைஜீரிய இரசிகர்களை மகிழ்ச்சிக் கடலில் ஆழ்த்தினார்.
ஆட்டத்தின் 75-வது நிமிடத்தில் அவரே இரண்டாவது கோலையும் அடிக்க நைஜீரியா 2-0 கோல் எண்ணிக்கையில் முன்னணி வகித்தது.
இதற்கிடையில் 83-வது நிமிடத்தில் ஐஸ்லாந்துக்கு கிடைத்த பினால்டி வாய்ப்பை ஜில்பி சிகுர்டசன் தவற விட்டார். பினால்டி பந்தை கோலாக்க முடியாமல், கோல் கம்பத்துக்கும் மேலே அவர் பந்தை அடிக்க, ஜஸ்லாந்துக்குக் கிடைத்த ஒரே வாய்ப்பும் பறிபோனது.
இறுதியில் நைஜீரியா 2-0 கோல் எண்ணிக்கையில் ஐஸ்லாந்தை வென்றது.
