டோக்கியோ, மே 28- ஜப்பான் சென்றுள்ள பிரதமர் மன்மோகன்சிங் டோக்கியோவில் தொழில் அதிபர்களை சந்தித்தார். அதில் ஏராளமான தொழில் முனைவோரும், தொழில் அதிபர்களும் கலந்து கொண்டனர்.
அப்போது, இந்தியாவில் தொழில் தொடங்க வரும்படி ஜப்பான் தொழில் அதிபர்களுக்கு மன்மோகன்சிங் அழைப்பு விடுத்தார். மேலும் அவர் பேசியதாவது:-
இந்தியா-ஜப்பான் இடையே தற்போது ரூ.1 லட்சம் கோடிக்கு வர்த்தகம் நடைபெற்று வருகிறது. இது போதுமானது அல்ல. எனவே, ஜப்பான் தொழில் அதிபர்கள் இந்தியாவில் தொழில் தொடங்க முன் வரவேண்டும்.
இந்தியாவில் மாநிலங்களுக்கு இடையே வரிவிதிப்பு மாறுபடுவதாகவும், அதில் சில பிரச்சினைகள் இருப்பதாகவும் தொழில் அதிபர்கள் தெரிவித்தனர். அதைப்பற்றி கவலைப்பட தேவையில்லை. அதுபோன்ற தடைகள் சீரமைக்கப்படும் என உறுதி அளிக்கிறேன். இவ்வாறு பிரதமர் மன்மோகன்சிங் தெரிவித்தார்.
