ஈப்போ, ஆகஸ்ட் 14 – நடந்து முடிந்த 13 வது பொதுத்தேர்தலில், பேராக் மாநிலம் லூபோக் மெர்பாவ் சட்டமன்ற தொகுதி தேர்தல் முடிவை எதிர்த்து தாக்கல் செய்யப்பட்டிருந்த தேர்தல் மனுவை ஈப்போ தேர்தல் நீதிமன்றம் நேற்று தள்ளுபடி செய்துள்ளது.
தேர்தல் மனு 1954, பிரிவு 9 மற்றும் 34 ஆகிய விதிமுறைகளுக்கு இணங்க மனுதாரர் முகமட் ரிட்சுவான் ஹாசிப் மனுத் தாக்கல் செய்யவில்லை என்று கூறி நீதிபதி டத்தோ அப்துல் ரஹ்மான் செப்லி அவரது மனுவைத் தள்ளுபடி செய்தார்.
மேலும், தேர்தல் ஆணையத்திற்கும், லூபோக் மெர்பாவ் சட்டமன்ற உறுப்பினர் டத்தோ சிட்டி சல்மா மட் ஜுசாக்கிற்கும், செலவுத்தொகையாக தலா 50,000 ரிங்கிட்டை முகமட் ரிட்சுவான் தரவேண்டும் என்றும் நீதிபதி உத்தரவிட்டார்.
நடந்து முடிந்த மே 5 பொதுத்தேர்தலில், அம்னோ வேட்பாளரான சிட்டி சல்மா மட் ஜுசா தன்னை எதிர்த்துப் போட்டியிட்ட பாஸ் வேட்பாளரான முகமட் சைனுதீன் முகமட் யூசோப்பை விட 53 வாக்குகள் வித்தியாசத்தில் வெற்றி பெற்றார்.
