கோலாலம்பூர், டிச 05 – 13 வது பொதுத்தேர்தலில் வங்காள தேசத்தவர்கள் வாக்களித்தார்கள் என்று எதிர்கட்சித் தலைவர் அன்வார் இப்ராகிம் கூறியதாக உள்ள காணொளி ஆதாரத்தை பிரதமர் நஜிப் துன் ரசாக் இன்று அம்னோ பொதுக்கூட்டத்தில் திரையிட்டுக் காட்டினார்.
அந்த 1 நிமிட காணொளியில் 40,000 ஆவி வாக்காளர்கள் மலேசியாவிற்கு கொண்டுவரப்பட்டார்கள் என்று பல்வேறு செய்தித்தளங்களில் கூறுவது போன்ற காட்சிகள் உள்ளன. ஆனால் அவர்கள் எந்த நாட்டைச் சேர்ந்தவர்கள் என்பது குறிப்பிடப்படவில்லை.
அதே நேரத்தில், அந்தக் காணொளியில் வங்காள தேசிகளும், இந்தோனேசியர்களும் வாக்களித்ததால் தான் தேசிய முன்னணி வெற்றியடைந்தது என்றும் அன்வார், பிரச்சாரக்கூட்டங்களில் கூறுவது போன்ற காட்சிகள் உள்ளது குறிப்பிடத்தக்கது.
