புது டெல்லி, ஆகஸ்ட் 5 – இந்தியா-பாகிஸ்தான் எல்லைப்பகுதியான பூஞ்சில், 3 இந்தியர்களை பிணைக்கைதியாக வைத்திருந்த தீவிரவாதியை இந்திய பாதுகாப்புப் படை கைது செய்தது. உஸ்மான் கான் என்ற அந்த பயங்கரவாதி, பாகிஸ்தானில் இருந்து வந்ததாகத் தெரிவித்துள்ளான். இதில் மற்றொரு அதிர்ச்சிகரமான உண்மை, அவன் வயது 16 என்பதாகும்.
ஆகஸ்ட் 4-ம் தேதி (நேற்று ) இரவு 11 மணி முதல் பூஞ்ச் பகுதியில், பாகிஸ்தான் இராணுவமும், உதம்பூர் வனப்பகுதி அருகே தீவிரவாதிகளும் இந்திய இராணுவத்தினர் மீது தொடர் தாக்குதலை நடத்தி வந்தனர். இந்த தாக்குதலின் போது தீவிரவாதிகள், பொது மக்கள் 3 பேரை பிணைக்கைதிகளாக பிடித்து வைத்து இருந்தனர். நீண்ட நேரம் நடைபெற்ற தாக்குதலுக்கு பின், அவர்களை விடுவித்தனர். அப்போது நடந்த தாக்குதலில் 2 தீவிரவாதிகள் உயிரிழந்தனர். தீவிர தேடுதல் வேட்டைக்குப் பிறகு தீவிரவாதி ஒருவனை பாதுகாப்பு படையினர் கைது செய்தனர்.
அவனிடம் நடத்தப்பட்ட முதல்கட்ட விசாரணையில், இந்திய சுதந்திர தினத்தை குறி வைத்து, தீவிரவாதிகள் 12 நாட்களுக்கு முன்பே இந்தியாவிற்குள் நுழைந்து விட்டதாக தெரிவித்துள்ளான். லக்ஷர் இ தொய்பா அமைப்பில் பயிற்சி பெற்ற அவனுக்கு, இந்துக்களை கொல்ல உத்தரவு பிறப்பிக்கப்பட்டுள்ளது அந்த விசாரணையில் தெரியவந்துள்ளது.
கடந்த சில நாட்களுக்கு முன்பு பஞ்சாப்பில், தீவிரவாதிகள் பயங்கர தாக்குதல் நடத்தி உள்ள நிலையில், பயங்கரவாதிகள் இந்திய சுதந்திர தினத்தை குறி வைத்துள்ளதால், இந்திய நகரங்களை கடுமையான பாதுகாப்பு வளையத்திற்குள் கொண்டு வர இந்திய அரசு முடிவு செய்துள்ளது.
