சென்னை – திமுக கூட்டணியில் இடம் பெற்றுள்ள கட்சிகளில் ஒன்றான இந்திய யூனியன் முஸ்லீம் லீக் கட்சிக்கு ஐந்து தொகுதிகள் ஒதுக்கீடு செய்யப்பட்டுள்ளது. வரும் தமிழக சட்டமன்றத் தேர்தலில் திமுக – காங்கிரஸ் கூட்டணியில் இந்திய யூனியன் முஸ்லீம் லீக் கட்சியும் தன்னை இணைத்துக் கொண்டது.
இன்று தொகுதி பேச்சிவார்த்தை மற்றும் பங்கீடு குறித்து திமுக தலைவர் கருணாநிதியும், இந்திய யூனியன் முஸ்லீம் லீக் தமிழ் மாநிலத் தலைவர் காதர் மொய்தீனும் கலந்தாலோசித்தனர். இந்நிலையில் பேச்சு வார்த்தைக்குப் பின் முஸ்லீம் லீக் கட்சிக்கு 5 தொகுதிகளை திமுக ஒதுக்கியுள்ளது.
இதுகுறித்த ஒப்பந்தத்தில் கருணாநிதியும், காதர் மொய்தீனும் கையெழுத்திட்டனர். பிற கூட்டணி கட்சிகளுடன் பேச்சுவார்த்தை முடிந்த பின்னர் முஸ்லீம் லீக் கட்சி போட்டியிடும் தொகுதிகள் குறித்த அறிவிப்பு வெளியிடப்படும் என திமுக வெளியிட்டுள்ள அறிக்கையில் குறிப்பிடப்பட்டுள்ளது.
