கோலாலம்பூர்: கொவிட் -19 தொற்றுக் காரணமாக இன்றைய நாடாளுமன்ற அமர்வு 1 மணியுடன் நிறுத்தப்பட்டது.
இந்த முடிவு இன்றைய அமர்வுக்கு மட்டுமா அல்லது முழு வாரத்திற்குமா என்பது உடனடியாகத் தெரியவில்லை.
காலை 10 மணிக்கு நாடாளுமன்ற அமர்வுக்கு பின்னர் காலை 10.30 மணிக்குப் பிறகு சபாநாயகர் அசார் அசிசான் ஒன்பது நாடாளுமன்ற உறுப்பினர்களைச் சந்தித்தார்.
முகமட் அஸ்மின் அலி (பெர்சாத்து-கோம்பாக்), அகமட் சாஹிட் ஹமிடி (தேசிய முன்னணி-பாகன் டத்தோ), இஸ்மாயில் சப்ரி யாகோப் (அம்னோ-பெரா), ஷாஹிடான் காசிம் (தேசிய முன்னணி-அராவ்), தக்கியுடின் ஹாசன் (பாஸ்-பாசிர் புத்தே), அந்தோனி லோக் (ஜசெக-சிரம்பான்), ஜோஹாரி அப்துல் ரஹ்மான் (சுங்கை பட்டாணி- பிகேஆர்), ஹாசானுடின் முகமட் யுனுஸ் (பாஸ்- உலு லாங்காட்), ரொஸ்மான் இஸ்லி (வாரிசாந் லாபுவான்) ஆகியோர் அந்த சந்திப்பில் கலந்து கொண்டனர்.
கொவிட் -19 காரணமாக நாடாளுமன்ற விதிகள் 12 (1) இன் கீழ் இந்த முடிவு எடுக்கப்பட்டுள்ளதாக சட்டத்துறை அமைச்சர் தக்கியுடின் ஹசான் தெரிவித்தார்.
நாடாளுமன்றம் செகாம்புட் மாவட்டத்தின் கீழ் இருப்பதாகவும், கொவிட் -19 நோய்த்தொற்றுகள் ஏற்படும் அபாயம் அதிகம் என்றும் சுகாதார அமைச்சகம் தெரிவித்துள்ளது.
“கூட்டத்தின் அடிப்படையில் (சபாநாயகருடன் ), நாடாளுமன்ற அமர்வை முன்கூட்டியே முடிக்க நாடாளுமன்ற உறுப்பினர்களும் ஒப்புக் கொண்டுள்ளனர்,” என்று அவர் கூறினார்.
