காபூல், ஜூன் 11 – ஆப்கானில் அமெரிக்க படைவீரர்களின் தவறான தாக்குதலில் சொந்தப்படைவீரர்கள் 5 பேர் பலியாகியுள்ளனர்.
ஆப்கானிஸ்தானில் அமெரிக்க படையினர் தீவிரவாதிகளை ஒடுக்கும் நடவடிக்கையிலும், பாதுகாப்பு பணியிலும் ஈடுபட்டு வருகின்றனர். இந்த நிலையில் அங்கு ஜாபுல் மாகாணத்தில் அர்கான்தாப் மாவட்டத்தில் அமெரிக்க வீரர்கள் 5 பேர் ஒரு தீவிரவாத தாக்குதல் நடவடிக்கையை நடத்தி விட்டு, தங்கள் முகாமுக்கு திரும்பிக்கொண்டிருந்தனர்.
அப்போது அவர்களை தீவிரவாதிகள் என கருதி அமெரிக்க படை வீரர்கள் வான்வழித் தாக்குதல் நடத்தினர். இதில் சிக்கிய ஐந்து அமெரிக்க படை வீரர்களும் பலியாகினர்.
இதுதொடர்பாக தலீபான் செய்தி தொடர்பாளர் காரி யூசுப் அகமதி கூறுகையில், ‘‘வெளிநாட்டு படைகள் மீது போராளிகள் தாக்குதல் நடத்தினர். அப்போது அமெரிக்க ராணுவ ஹெலிகாப்டர்கள் தலையிட்டன. அவர்கள் தவறுதலாக தங்கள் சொந்தப்படையினரையே கொன்று விட்டனர்’’ என்று கூறியுள்ளார்.
