இஸ்லாமாபாத், மார்ச் 24 – இந்தியாவுடன் நட்புறவையே நாங்கள் விரும்புகின்றோம் என பாகிஸ்தான் அதிபர் மம்னூன் ஹுசைன் தெரிவித்துள்ளார். பாகிஸ்தானின் தேசிய தினம் நேற்று அந்நாடு முழுவதும் கோலாகலமாகக் கொண்டாடப்பட்டது.
தலைநகர் இஸ்லாமாபாத்தில் 7 ஆண்டுகளுக்கு பிறகு நேற்று முதன் முறையாக நடைபெற்ற தேசிய தின அணிவகுப்பு மரியாதையை அந்நாட்டின் அதிபர் மம்னூன் ஹுசைன் ஏற்றுக்கொண்டார்.
முப்படை வீரர்கள் மற்றும் பொதுமக்களிடையே தேசிய தின சிறப்புரையாற்றிய மம்னூன் ஹுசைன், “இந்தியா-பாகிஸ்தான் இடையே வலிமையான நட்புறவு உருவாக வேண்டும். அதனையே நாங்கள் விரும்புகின்றோம். காஷ்மீர் விவகாரம் உள்ளிட்ட எல்லா பிரச்சனைகளுக்கும் பேச்சுவார்த்தை மூலம் சுமூகமான தீர்வு காண வேண்டும் என்று நினைக்கிறோம்.”
“இது தொடர்பாக இரு நாடுகளுக்கிடையிலும் மீண்டும் பேச்சுவார்த்தை தொடங்கப்பட வேண்டும்” என்று அவர் கூறியுள்ளார். இந்நிலையில் இந்தியா-பாகிஸ்தான் நட்புறவு பற்றி இந்தியப் பிரதமர் மோடி கூறுகையில், “பாகிஸ்தான் தீவிரவாதத்தை ஒழித்தால் அவர்களுடன் நட்பு பாராட்ட நாங்கள் தயாராக உள்ளோம்” என்று அவர் கூறியுள்ளார்.
