கோலாலம்பூர், ஆகஸ்ட் 5 – கோலாலம்பூரில் நடைபெறவுள்ள ‘கேஎல் சிட்டி கிராண்ட் ஃப்ரீ’ என்ற கார் பந்தய நிகழ்ச்சியை முன்னிட்டு, வரும் வெள்ளிக்கிழமை முதல் ஞாயிற்றுக்கிழமை வரை நகரின் முக்கியச் சாலைகள் மூடப்படுகின்றன.
வரும் ஆகஸ்ட் 7-ம் தேதி முதல் 9-ம் தேதி வரையில் நடைபெறவுள்ள இந்நிகழ்ச்சியை முன்னிட்டு ஜாலான் அம்பாங், ஜாலான் சுல்தான் இஸ்மாயில், ஜாலான் ராஜா சோழன், ஜாலான் பேராக் மற்றும் ஜாலான் பி.ரம்லி ஆகிய சாலைகள் காலை 7.30 மணி முதல் மாலை 6 மணி வரையில் மூடப்படவுள்ளதாக அறிவிக்கப்பட்டுள்ளது.
எனவே, இந்நிகழ்ச்சியில் கலந்து கொள்பவர்கள் பொதுப் போக்குவரத்தைப் பயன்படுத்தும் படி, நகர் உள்நாட்டு பாதுகாப்பு மற்றும் பொது ஒழுங்கின் தலைமை மூத்த துணை ஆணையர் டத்தோ வான் அப்துல் பாரி வான் அப்துல் காலிட் தெரிவித்துள்ளார்.
எனினும், அந்த சாலைகளின் அருகே அமைந்துள்ள நிறுவனங்களில் பணியாற்றுபவர்கள் சிறப்பு அனுமதி பெறுவதன் மூலம் பயன்படுத்த முடியும் என்றும், கோலாலம்பூர் ஷங்கரி -லா தங்கும்விடுதியில் அதற்கான அனுமதிச் சீட்டுகளை அவர்கள் பெற்றுக் கொள்ளலாம் என்றும் வான் அப்துல் பாரி தெரிவித்துள்ளார்.
