மும்பை – ஐஸ்வர்யா ராய் ஏறக்குறைய 5 ஆண்டுகள் கழித்து நடித்திருக்கும் இந்திப் படம் ‘ஜஸ்பா’. இந்தப் படம் அக்டோபர் 9-ஆம் தேதி வெளியாகிறது.
ஜஸ்பா படத்தின் முன்னோட்டக் காட்சிகள் தற்போது வெளியிடப்பட்டுள்ளன.
சஞ்சய் குப்தா இயக்கிய இந்தப் படத்தில் நடிகை ஐஸ்வர்யா ராய் வழக்கறிஞர் கதாபாத்திரத்தில் நடித்திருக்கிறார்.
மேலும், இந்தப் படத்தில் நடிகர் இர்பான் கான் பணி இடைநீக்கம் செய்யப்பட்ட காவல்துறை அதிகாரியாகவும், நடிகை ஷபானா ஆஸ்மி பள்ளிக்கூட ஆசிரியையாகவும் நடித்திருக்கிறார்கள்.
மீண்டும் நடிக்க வந்திருப்பது குறித்து ஐஸ்வர்யாராய் கூறியதாவது:
“நான் 5 வருடங்களாகப் படங்களில் நடிக்கவில்லை. ஆனாலும், சினிமாவை விட்டு ஒதுங்கிவிட்டதாக உணரவில்லை.
நடிகர், நடிகையாக இருப்பவர்களுக்குத் தங்கள் வேலையில் திருப்தி ஏற்படவேண்டும். அது ரொம்ப முக்கியம். திருமணத்துக்கு முன்பும் சரி; இப்போதும் சரி. எப்போதும் அர்ப்பணிப்பு உணர்வோடுதான் எனது கடமையைச் செய்கிறேன்.
எனக்கேற்ற கதைக்காகக் காத்திருந்தேன். அந்தக் கதை இப்போது அமைந்திருக்கிறது. அதனால் நடிக்கிறேன்” எனக் கூறியுள்ளார்.
