சென்னை – தென்னிந்திய நடிகர் சங்கத் தேர்தல் வெற்றிக்கு பின்னர் சங்கத்தை நிர்வகிக்கும் பணிகளில் பல்வேறு முயற்சிகளுடன் நாசர் தலைமையிலான அணியினர் களமிறங்கி உள்ளனர். தேர்தல் முடிந்து ஏறக்குறைய ஒரு மாதங்கள் ஆகிவிட்ட நிலையில், சங்கத்தின் மூத்த மற்றும் முக்கிய உறுப்பினர்களை சந்தித்து வருகின்றனர்.
நேற்று மூத்த பத்திரிக்கையாளரும், நடிகருமான சோவை மருத்துவமனையில் சந்தித்த அவர்கள், திமுக தலைவர் கருணாநிதியையும், நடிகரும் தேமுதிக தலைவருமான விஜயகாந்த் ஆகியோரையும் சந்தித்தனர்.
இந்நிலையில் புதிய நிர்வாகிகளுக்கு மூத்த உறுப்பினர் என்ற முறையில் கருணாநிதி சில ஆலோசனைகளை வழங்கி உள்ளது தெரியவந்துள்ளது. குறிப்பாக எந்தவித ஆர்ப்பாட்டமும் இல்லாமல் செயல்படுமாறு அவர் கூறியதாக நாசர் பத்திரிக்கையாளர்களிடம் தெரிவித்தார்.
