சிங்கப்பூர் – பாலுணர்வைத் தூண்டும் வகையிலான நாவல்கள், புத்தகங்கள் என சுமார் 240 பதிப்புகளின் மீதான தடையை சிங்கப்பூர் ஊடக மேம்பாட்டு அதிகார சபை (எம்டிஏ) நேற்று அதிரடியாக நீக்கம் செய்துள்ளது.
விரும்பத்தகாத வெளியீடுகள் சட்டத்தின் கீழ் அப்பதிப்புகள் கடந்த 1967 -ம் ஆண்டு முதல் சிங்கப்பூரில் விற்பனை செய்வதற்கும், இறக்குமதி செய்வதற்கும் தடை விதிக்கப்பட்டிருந்தது.
அப்புத்தகங்களில் ‘திராவிட நாடு’ போன்ற காலனித்துவ எதிர்ப்பு புத்தகங்களும், ‘த லாங் மார்ச்’ போன்ற கம்யூனிச சித்தாந்தங்கள் அடங்கிய புத்தகங்களும், 18-ம் நூற்றாண்டில் முதன் முதலாக பதிப்பிக்கப்பட்ட ‘பேனி ஹில்’ போன்ற பாலுணர்வைத் தூண்டும் வகையிலான நாவல்களும் உள்ளதாக செய்திகள் வெளியாகியுள்ளன.
அதிரடியாக அப்புத்தகங்கள் மீதான தடை நீக்கம் செய்யப்பட்டதற்கான காரணம் குறித்து சிங்கப்பூர் ஊடக மேம்பாட்டு அதிகாரசபை கூறுகையில், சமுதாய நெறிகளுக்கும், கால ஓட்டத்திற்கும் ஏற்ப அப்புத்தகங்கள் மதிப்பிடப்பட்டு, இம்முடிவு எடுக்கப்பட்டுள்ளதாகத் தெரிவித்துள்ளது.
தடை செய்யப்பட்டிருந்த 250-க்கும் மேற்பட்ட பதிப்புகளில் தற்போது 240-க்கு அனுமதி வழங்கப்பட்டுள்ளது. எனினும், இன்னும் 17 பதிப்புகள் தடை செய்யப்பட்டே வைக்கப்பட்டுள்ளன.
அவற்றில், ‘பெந்தௌஸ் – Penthouse’ போன்ற ஆபாச இதழ்களும் அடங்கியுள்ளன என்பது குறிப்பிடத்தக்கது.
