கோலாலம்பூர் : மலேசியாவிலேயே மிக அதிக அளவில் பொருளாதார வலிமை கொண்ட வட்டாரமாக, கோலாலம்பூரை உள்ளிட்ட கிள்ளான் பள்ளத்தாக்கு கருதப்படுகிறது.
ஆனால் கிள்ளான் பள்ளத்தாக்கையும் மிஞ்சும் விதத்தில் இன்னொரு பொருளாதார மண்டலம் உருவாகி வருகிறது. எல்லாம் திட்டமிட்டபடி சரியாக நடந்தால், ஜோகூர் மாநிலத்தின் ஜோகூர்-சிங்கப்பூர் சிறப்பு பொருளாதார மண்டலம் கிள்ளான் பள்ளத்தாக்கை விட மிகப் பெரிய பொருளாதார வலிமை கொண்ட வட்டாரமாக அடுத்த 5 முதல் 10 ஆண்டுகளுக்குள்ளான உருவெடுக்கும் என பொருளாதார அமைச்சர் ரபிசி ரம்லி தெரிவித்துள்ளார்.
நாட்டின் உள்நாட்டு உற்பத்தியில் (ஜிடிபி-(GDP) கூடுதலாக 28 பில்லியன் அமெரிக்க டாலரை இந்த ஜோகூர்-சிங்கப்பூர் சிறப்பு பொருளாதார மண்டலம் தன் பங்களிப்பாக நாட்டிற்கு வழங்கும் என்றும் ரபிசி தெரிவித்தார்.
மலேசியப் பொருளாதாரம் குறித்த கருத்தரங்கில் உரையாற்றும்போது ரபிசி இந்த விவரங்களை வெளியிட்டார்
ஜோகூருக்கும் சிங்கப்பூருக்கும் இடையிலான அனுகூலங்களையும் சாதகங்களையும் வைத்துப் பார்க்கும்போது நாட்டின் அடுத்த கட்ட வளர்ச்சி வட்டாரமாக ஜோகூர்-சிங்கப்பூர் சிறப்பு பொருளாதார மண்டலம் திகழும் என்றும் ரபிசி தெரிவித்தார்.
