கொல்கத்தா: இந்தியாவில் நடைபெற்று வரும் டி-20 உலகக் கிண்ண கிரிக்கெட் போட்டிகளில் நேற்று கொல்கத்தாவில் நடைபெற்ற ஆட்டத்தில் நியூசிலாந்து வங்காளதேசத்தை 75 ஓட்டங்களில் வெற்றி கொண்டது.
20 ஓவர்கள் நிறைவடைந்தபோது நியூசிலாந்து 8 விக்கெட்டுகளை இழந்து 145 ஓட்டங்களை (ரன்) எடுத்தது. அடுத்து இரண்டாவது பாதி ஆட்டத்தில் விளையாடிய வங்காளதேசம் 10 விக்கெட்டுகளையும் 15.4 ஓவர்களிலேயே இழந்து 70 ஓட்டங்களை மட்டுமே எடுக்க முடிந்தது.
இதைத் தொடர்ந்து 75 ஓட்டங்களில் நியூசிலாந்து வென்றதாக அறிவிக்கப்பட்டது.
இங்கிலாந்து இலங்கையை வெற்றி கொண்டது
மற்றொரு ஆட்டத்தில் இங்கிலாந்தும் இலங்கையும் மோதின. இதில் முதல் பாதி ஆட்டத்தில் இங்கிலாந்து 20 ஓவர்கள் நிறைவடைந்தபோது, 4 விக்கெட்டுகளை மட்டுமே இழந்து 171 ஓட்டங்களை எடுத்தது.
இரண்டாவது பாதி ஆட்டத்தில் இலங்கை, 20 ஓவர்களை முடித்தபோது 8 விக்கெட்டுகளை இழந்து 161 ஓட்டங்கள் மட்டுமே எடுக்க முடிந்தது.
இதைத் தொடர்ந்து இங்கிலாந்து 10 ஓட்டங்கள் வித்தியாசத்தில் வென்றதாக அறிவிக்கப்பட்டது.
இந்தியா-ஆஸ்திரேலியா பலப்பரிட்சை
இன்று இந்திய நேரப்படி இரவு 7.30 மணிக்கு நடைபெறும் ஆட்டத்தில் இந்தியாவும், ஆஸ்திரேலியாவும் மோதுகின்றன.
