அங்கோர்வாட் – கம்போடியாவில் பிரபல சுற்றுலாத்தளமான அங்கோர்வாட்டில், கடந்த வெள்ளிக்கிழமை சுற்றுலாப்பயணிகளைச் சுமந்து கொண்டு சென்று கொண்டிருந்த பெண் யானை ஒன்று திடீரென சரிந்து விழுந்து இறந்துள்ளது.
40 – 45 வயது இருக்கலாம் என நம்பப்படும் அந்த யானை பாக்ஹெங் மலை அருகே தனது கடைசி மூச்சை விட்டுள்ளது. முன்னதாக சுற்றுலாப்பயணிகள் இருவரை சுமந்து கொண்டு 40 நிமிடங்கள் நடந்துள்ளது.
கடந்த 2001-ம் ஆண்டு முதல் சுற்றுலா நிறுவனம் ஒன்றில் பணியாற்றி வரும் அந்த யானைக்கு, அதிக வெப்பம் காரணமாகவும், போதுமான காற்றோட்ட வசதிகள் இல்லாததாலும் மாரடைப்பு ஏற்பட்டு இருந்திருக்கலாம் என அதைப் பரிசோதித்த கால்நடை மருத்துவர்கள் தெரிவித்துள்ளதாக அந்நாட்டு நாளிதழ் ஒன்று செய்தி வெளியிட்டுள்ளது.
கடந்த வெள்ளிக்கிழமை அப்பகுதிகளில் சுமார் 40 டிகிரி செண்டிகிரேட் வெப்பநிலை நிலவியது குறிப்பிடத்தக்கது.
இதனிடையே, யானை சாலையோரம் சரிந்து கிடக்கும் புகைப்படத்தை தனது பேஸ்புக்கில் யெம் செனோக் என்பவர் வெளியிட, அது நட்பு ஊடகங்களில் பரவி, தற்போது 8,000-த்திற்கும் மேற்பட்டோர் பகிர்ந்துள்ளனர்.
இந்நிலையில், அங்கோர் வாட்டில் யானை சவாரியை தடை செய்யக் கோரி இணையம் (change.org petition) வழியாக கோரிக்கை மனு ஒன்று உருவாக்கப்பட்டுள்ளது.
இதுவரை அதில் 12,000 பேர் கையெழுத்திட்டுள்ளனர்.
