சென்னை – தமிழ்த் திரையுலகின் முன்னணிக் கதாநாயகர்களில் ஒருவராக உருவாகி விட்ட சிவகார்த்திகேயனின் அடுத்த படமான ‘வேலைக்காரன்’ திரையுலகில் பலத்த எதிர்பார்ப்புகளை ஏற்படுத்தியிருக்கின்றது.
அந்தப் படத்தின் முதல் தோற்ற விளம்பரங்கள் – பதாகைகள் இன்று திங்கட்கிழமை வெளியிடப்பட்டன.
கழுத்தில் கழுத்துப் பட்டை (டை), கணினி நிறுவனப் பணியாளர் போன்று முழுக்கை சட்டையுடன் தோற்றம், அதற்கேற்ப கழுத்தில் தொங்கும் நிறுவன அடையாள அட்டை – ஒரு கையில் வழக்கமாக கணினி நிறுவனப் பணியாளர்கள் கொண்டு செல்லும் கைப்பை – ஆனால் அதே தோற்றத்திலேயே வெண்மைச் சட்டையில் உறைந்திருக்கும் இரத்தக் கறை, இடது கையில் இரத்தம் தோய்ந்த நீண்ட அரிவாள் – என வித்தியாசமான முறையில் சிவகார்த்திகேயன் தரும் தோற்றத்துடன் இன்று வெளியாகியிருக்கிறது வேலைக்காரன் படத்தின் முதல் தோற்றம்!
எதிர்பார்ப்பு எகிறியிருப்பதற்கான மற்றொரு முக்கியக் காரணம் ‘தனிஒருவன்’ படத்தின் மூலம் வசூல் சாதனை ஏற்படுத்திய இயக்குநர் மோகன்ராஜா (நடிகர் ஜெயம் ரவியின் அண்ணன்) கைவண்ணத்தில் அடுத்து வெளிவரும் படம் ‘வேலைக்காரன்’ என்பதுதான்!
