சென்னை – தமிழகத்தின் தலைமைச் செயலாளராக இருந்த பி.ராம மோகன ராவ் (படம்) இல்லம் மற்றும் தலைமைச் செயலகத்தில் உள்ள அவரது அலுவலகத்தில் வருமான வரித்துறை அதிகாரிகள் நேற்று புதன்கிழமை அதிகாலை முதல் அதிரடி சோதனை நடத்தியதில் 100 கோடி ரூபாய்க்கும் அதிகமான சொத்து ஆவணங்கள் இதுவரை சிக்கியுள்ளன.
இந்திய வரலாற்றில் ஒரு மாநில தலைமைச் செயலாளரின் அலுவலகத்தில் நுழைந்து வருமான வரித்துறை சோதனை நடத்தியது இதுதான் முதன் முறை என்றும் கூறப்படுகின்றது.
இதனைத் தொடர்ந்து ராம மோகனராவ் தலைமைச் செயலாளர் பதவியிலிருந்து இடைநீக்கம் செய்யப்பட்டுள்ளார்.
புதிய தலைமைச் செயலாளர் நியமனம்
ராம மோகனராவுக்குப் பதிலாக தமிழக அரசின் புதிய தலைமைச் செயலாளராக கிரிஜா வைத்தியநாதன் (படம்) நியமிக்கப்பட்டுள்ளார். கூடுதல் தலைமைச் செயலாளர் பதவியில் இருந்த அவருக்கு பதவி உயர்வு வழங்கப்பட்டுள்ளது.
நிர்வாக சீர்திருத்தம், ஊழல் கண்காணிப்பு ஆணையர் பொறுப்பையும் அவர் கூடுதலாகக் கவனிப்பார் எனவும் தமிழக அரசு அறிவித்துள்ளது.
கிரிஜா 1981-ம் ஆண்டு தமிழ்நாடு பிரிவில் ஐ.ஏ.எஸ் அதிகாரியானார். தமிழக சுகாதார செயலாளராகவும் பணியாற்றியிருக்கிறார்.
