கோலாலம்பூர் – மக்கள் தன்னார்வப் படைப்பிரிவைச் (ரேலா) சேர்ந்த 3 வீரர்களை அடித்துக் காயப்படுத்திய வழக்கில், கைது செய்யப்பட்ட 29 வயதான ‘டத்தோஸ்ரீ’ பட்டம் கொண்ட தொழிலதிபருக்கு நீதிமன்றம் 4 நாட்கள் தடுப்புக் காவல் விதித்திருக்கிறது.
நேற்று திங்கட்கிழமை மாலை அம்பாங் ஜெயா காவல்துறைத் தலைமையகத்திற்கு வந்த அவரை கைது செய்த அதிகாரிகள் இன்று செவ்வாய்க்கிழமை நீதிமன்றத்தில் நிறுத்தினர்.
இதனையடுத்து, இன்று முதல் நான்கு நாட்கள் தடுப்புக் காவல் விசாரணை விதிக்கப்பட்டிருக்கிறது.
கடந்த வெள்ளிக்கிழமை, கம்போங் பாரு அம்பாங்கில் உள்ள கௌட் ஆங் யா வழிபாட்டுத்தலத்தில் நடந்த நிகழ்ச்சி ஒன்றில் கலந்து கொள்ள வந்த ‘டத்தோஸ்ரீ’ தனது காரை வழிபாட்டுத்தலத்தின் முன் நிறுத்தியதாகவும், அப்போது ரேலா படையைச் சேர்ந்த 3 பேர் அவரது காரை அங்கிருந்து நகர்த்துமாறு கேட்டுக் கொண்ட போது ஆத்திரமடைந்த ‘டத்தோஸ்ரீ’ அவர்களைத் தாக்கியதாகவும் செய்திகள் வெளியாகின என்பது குறிப்பிடத்தக்கது.
