சென்னை – அரசியல் போருக்குத் தயாராகுங்கள் என்று கூறிவிட்டு சில மாதங்களுக்கு அமைதியாகிவிட்ட நடிகர் ரஜினிகாந்த் மீண்டும் இரசிகர்களுடன் சந்திப்பு என்ற அதிரடி அஸ்திரத்தைப் பிரயோகித்துள்ளார்.
எதிர்வரும் டிசம்பர் 26 முதல் டிசம்பர் 31-ஆம் தேதிவரை காலை 8.00 மணி முதல் பிற்பகல் 3.00 மணிவரை, கோடம்பாக்கத்திலுள்ள ராகவேந்திரா கல்யாண மண்டபத்தில் தனது இரசிகர்களை ரஜினிகாந்த் சந்திப்பார் என அறிவிக்கப்பட்டிருக்கிறது.
இதற்கான போலீஸ் பாதுகாப்புகளைக் கோரி, ரஜினி இரசிகர் மன்ற நிர்வாகிகள் காவல் துறைக்கு விண்ணப்பித்துள்ளனர்.
நாள் ஒன்றுக்கு சுமார் ஆயிரம் இரசிகர்களைச் சந்தித்து அவர்களுடன் ரஜினி புகைப்படங்கள் எடுத்துக் கொள்வார் என்றும் அறிவிக்கப்பட்டிருக்கிறது.
இந்த சந்திப்பு நடைபெறும் காலகட்டத்தில் ஆர்.கே.நகர் சட்டமன்ற இடைத் தேர்தலின் முடிவுகளும் வெளியாகிவிடும் என்பதாலும் – தமிழக அரசியலின் நடப்பு நிலவரம் அப்போது ஓரளவுக்கு தெளிந்த நிலையில் இருக்கும் என்பதாலும் – ரஜினியின் இரசிகர்கள் சந்திப்பு என்பதும், அதைத் தொடர்ந்த அறிவிப்புகளும் தமிழக அரசியல் களத்தின் அடுத்த பரபரப்பாக இருக்கும் என எதிர்பார்க்கப்படுகிறது.
