புத்ரா ஜெயா – துன் மகாதீர் எதிர்வரும் 14-வது பொதுத் தேர்தலில் போட்டியிடுவதற்கு 3 நாடாளுமன்றத் தொகுதிகளைப் பெயர் குறிப்பிட்டு கோடி காட்டியிருக்கிறார். ஆனாலும், எந்தத் தொகுதியில் போட்டியிடப் போகிறேன் என்பதை இதுவரை அறுதியிட்டுக் கூறாமல் தனது அரசியல் எதிரிகளுக்கு சாக்கு போக்கு காட்டி வருகிறார்.
மகாதீர் போட்டியிடப் போவதாகக் கூறப்படும் 3 தொகுதிகள் லங்காவி, குபாங் பாசு, மற்றும் புத்ரா ஜெயா ஆகியவையாகும்.
புத்ரா ஜெயா பிரிசிண்ட் 2 வட்டாரத்திலுள்ள இரவுச் சந்தைக்கு நேற்று மாலை வருகை தந்த மகாதீர் அங்கு வலம் வந்தபோது, அந்த இடத்தில் பரபரப்பு ஏற்பட்டது. பலரும் அவரைச் சந்திக்க ஆர்வத்துடன் நெருங்கி வந்ததோடு, புகைப்படங்கள் எடுக்கவும் முற்பட்டனர்.
இதன்மூலம், புத்ரா ஜெயாவிலும் தான் போட்டியிடக் கூடும் என்ற ஊகங்களுக்கு மகாதீர் மேலும் வலு சேர்த்துள்ளார்.
மகாதீர் அந்த இரவுச் சந்தையில் வலம் வந்த காட்சிகளை தனது முகநூல் (பேஸ்புக்) பக்கத்திலும் பதிவிட்டிருக்கிறார்.
மேலும் தனது துணைவியார் தோபுவான் சித்தி ஹஸ்மா இரவுச் சந்தையில் சுற்றி வந்து 4 ரிங்கிட்டுக்கு ஒரு மேலாடையை வாங்கினார் என்றும் தனது டுவிட்டர் தளத்தில் மகாதீர் குறிப்பிட்டிருக்கிறார். “அதுதான் என் மனைவி சித்தி ஹஸ்மா” என்றும் பெருமைப்பட்டிருக்கிறார் மகாதீர்.
