மாஸ்கோ – இரஷியாவின் ஏகபோகத் தலைவராக ஆதிக்கம் செலுத்தி வந்த அதிபர் விளாடிமிர் புடினுக்கும் (படம்) பெரும் தலைவலியாக உருவெடுத்துள்ளது கொவிட்-19.
அவரது பிரதமர் மிகாய்ல் மிஷூஸ்டின் கொவிட்-19 பாதிப்புக்கு உள்ளாகியிருக்கிறார் என்ற அறிவிப்பு வெளிவந்திருக்கும் நிலையில் ஞாயிற்றுக்கிழமை வரை, ஒரே நாளில் மட்டும் 10,633 புதிய பாதிப்புகளை இரஷியா பதிவு செய்திருக்கிறது.
இதன் மூலம் அந்நாட்டில் பாதிப்புக்கு உள்ளானவர்களின் எண்ணிக்கை 134,687 ஆக உயர்ந்திருக்கிறது.
மாண்டவர்களின் எண்ணிக்கை 1,280 ஆக பதிவாகியிருக்கிறது.
கடந்த நான்கு நாட்களில் தொடர்ச்சியாக 5 ஆயிரம் முதல் 6 ஆயிரம் வரையிலான புதிய பாதிப்புகளைக் கண்டிருக்கும் இரஷியாவில் மோசமாகப் பாதிக்கப்பட்ட நகராக மாஸ்கோ திகழ்கிறது.
இரஷியாவின் மொத்த பாதிப்புகளில் சரிபாதி, மாஸ்கோவில் அடையாளம் காணப்பட்டிருக்கிறது.
