கோலாலம்பூர்: மலேசியாவில் கடந்த 24 மணி நேரத்தில் 7 புதிய கொவிட்19 தொற்று சம்பவங்கள் பதிவு செய்யப்பட்டுள்ளதாக சுகாதார அமைச்சு இன்று செவ்வாய்க்கிழமை தெரிவித்தது.
இதைத் தொடர்ந்து நாட்டின் மொத்த கொவிட்19 பாதிப்பு எண்ணிக்கை 9,219-ஆக உயர்ந்துள்ளது.
புதிதாக அடையாளம் காணப்பட்ட 7 சம்பவங்களில் 4 பேர் வெளிநாடுகளிலிருந்து நாடு திரும்பியவர்கள் ஆவர். மேலும், 3 பேர் உள்நாட்டிலேயே தொற்றுக் கண்டுள்ளனர். கெடாவில் தாவார் மற்றும் சாலா தொற்றுக் குழுவில் மூன்று பேர் தொற்றுக் கண்டுள்ளனர்.
கெடாவில் தற்போது, சிவகங்கா தொற்றுக் குழு உட்பட, நான்கு புதிய தொற்றுக் குழுக்கள் உருவாகி இருப்பது குறிப்பிடத்தக்கது.
இன்று 26 பேர் குணமடைந்து வீட்டிற்கு செல்ல அனுமதிக்கப்பட்ட நிலையில் குணமடைந்தோரின் எண்ணிக்கை 8,902 -ஆக உயர்ந்துள்ளது.
நாட்டில் மொத்தம் 192 பேர் இன்னும் மருத்துவமனைகளில் சிகிச்சைப் பெற்று வருகின்றனர். அவர்களில் 8 பேர் அவசர சிகிச்சைப் பிரிவில் சிகிச்சைப் பெற்று வருகின்றனர். இருவருக்கு சுவாசக் கருவி உதவி தேவைப்படுகிறது.
