கோலாலம்பூர் : மாமன்னர் அல்-சுல்தான் அப்துல்லா ரியாதுடின் அல் முஸ்தாபா பில்லா ஷா, இன்று புதன்கிழமை ஜூன் 9 தொடங்கி முக்கிய அரசியல் தலைவர்களைச் சந்திக்கவிருக்கிறார்.
புதன்கிழமைகளில் வழக்கமாக நடைபெறும் அமைச்சரவைக் கூட்டத்திற்கு முன்னர் பிரதமர் டான்ஸ்ரீ மொகிதின் யாசினுக்கும், மாமன்னருக்கும் இடையில் சந்திப்பு நடைபெறும்.
இன்று புதன்கிழமை காலை மாமன்னருக்கும், பிரதமருக்கும் இடையிலான அரசியல் முக்கியத்துவம் வாய்ந்த சந்திப்பு நடைபெற்றது.
காலை 7.50 மணிக்கு அரண்மனைக்குள் நுழைந்த பிரதமரின் வாகனம் காலை 9.00 மணியளவில் அங்கிருந்து வெளியேறியது.
அதைத் தொடர்ந்து இன்று பிகேஆர் கட்சித் தலைவரும் நம்பிக்கைக் கூட்டணியின் தலைவருமான டத்தோஸ்ரீ அன்வார் இப்ராகிமையும் மாமன்னர் சந்திக்கிறார் என்ற அறிவிப்பு வெளியிடப்பட்டுள்ளது.
