பியூனஸ் அயர்ஸ், செப். 11- சர்வதேச ஒலிம்பிக் கவுன்சிலின் (ஐ.ஓ.சி.) 125-வது ஆண்டு பொதுக்குழு கூட்டம் அர்ஜென்டினா தலைநகர் பியூனஸ் அயர்ஸ் நகரில் 4 நாட்கள் நடந்தது.
கடைசி நாளான நேற்று, உலக விளையாட்டு அரங்கில் மிகவும் அதிகாரம் படைத்த பதவியான ஐ.ஓ.சி.யின் புதிய தலைவருக்கான தேர்தல் நடந்தது.
கடந்த 12 ஆண்டுகளாக தலைவராக இருந்த பெல்ஜியத்தின் ஜேக்ஸ் ரோச்சின் பதவி காலம் முடிவடைந்ததையடுத்து தலைவர் பதவிக்கு தாமஸ் பேச் (ஜெர்மனி), செர் மியாங் (சிங்கப்பூர்), ரிச்சர்ட் கேரியான் (பியுர்டோ ரிக்கோ), வு சிங்-கு (சீனத்தைபே), டெனிஸ் ஓஸ்வால்டு (சுவிட்சர்லாந்து), செர்ஜி புக்கா (உக்ரைன்) ஆகிய 6 பேர் போட்டியிட்டனர். புதிய தலைவரை தேர்வு செய்ய ஐ.ஓ.சி. உறுப்பினர்கள் வாக்களித்தனர்.
2-வது சுற்று வாக்கெடுப்பு முடிவில் ஜெர்மனியின் தாமஸ் பேச் 49 வாக்குகள் பெற்று புதிய தலைவராக தேர்ந்தெடுக்கப்பட்டார். அவருக்கு அடுத்தபடியாக ரிச்சர்ட் கேரியானுக்கு 29 வாக்குகள் கிடைத்தன.
ஜெர்மனியை சேர்ந்த 59 வயதான தாமஸ் பேச், 1976-ம் ஆண்டு ஒலிம்பிக்கில் வாள்சண்டை போட்டியின் பாயில் அணிகள் பிரிவில் தங்கப்பதக்கம் வென்றவர்.
ஒலிம்பிக்கிக்கில் தங்கப்பதக்கம் வென்றவர், ஐ.ஓ.சி.யின் தலைவர் ஆவது இதுவே முதல் முறையாகும்.
