ராஞ்சி, மே 3 – 7-வது ஐ.பி.எல். 20 ஓவர் கிரிக்கெட் தொடர் துபாய் ஐக்கிய அரபு எமிரேட்ஸில் நடைபெற்று வந்தது. தற்போது இந்தியாவில் நடைபெற்று வருகிறது.
ஜார்கண்ட் மாநிலம் ராஞ்சியில் நேற்றிரவு நடந்த 21-வது லீக் ஆட்டத்தில் சென்னை சூப்பர் கிங்ஸ் அணியும், கொல்கத்தா நைட் ரைடர்ஸ் அணியும் மோதின.
ஆட்டம் தொடங்குவதற்கு முன்பாக மழை குறுக்கிட்டு நீண்ட நேரம் பாதிப்பு ஏற்பட்டதால் ஆட்டம் 17 ஓவராக குறைக்கப்பட்டது. டாஸ் வென்ற சென்னை கேப்டன் டோணி முதலில் பேட் செய்ய தீர்மானித்தார்.
17 ஓவர்களில் சென்னை அணி 3 விக்கெட் இழப்புக்கு 148 ரன்கள் சேர்த்தது. பின்னர் 149 ரன்கள் இலக்கை நோக்கி கொல்கத்தா அணி விளையாடியது. கொல்கத்தா அணியால் நிர்ணயிக்கப்பட்ட 17 ஓவர்களில் 9 விக்கெட்டுக்கு 114 ரன்களே எடுக்க முடிந்தது.
இதன் மூலம் 34 ரன்கள் வித்தியாசத்தில் சென்னை அணி அபார வெற்றி பெற்றது. 6-வது ஆட்டத்தில் விளையாடிய சென்னை அணி தொடர்ச்சியாக பெற்ற 5-வது வெற்றி இதுவாகும். அதே சமயம் 6-வது ஆட்டத்தில் ஆடிய கொல்கத்தாவுக்கு இது 4-வது தோல்வியாகும்.
