நியூயார்க், ஆகஸ்ட் 8 – தமிழ் சினிமாவில் நமீதா நடிக்கவில்லை என்றாலும் நமிதாவுக்கான ரசிகர்கள் அப்படியேதான் இருக்கிறார்கள். நமிதாவின் இடத்தை நிரப்பப் போவதாகச் சொன்ன நடிகைகள் நான்கு மாதங்களில் காணாமல் போய்விட்டனர் என்பதுதான் உண்மை.
தமிழகம் மட்டுமல்ல அமெரிக்காவிலும் நமீதாவின் ரசிகர்கள் அநேகம்பேர் உள்ளனர் என்பதை சொல்லாமல் சொல்லியது ‘மெகா ஸ்டார்’ நிகழ்ச்சி.
ஜுலை 11-ம் தேதி மாலை 6.30 மணிக்கு அட்லாண்டாவிலும், ஜுலை 13-ம் தேதி சன் ஜோன்ஸிலும், ஜுலை 20-ம் தேதி லாஸ் ஏஞ்சல்ஸிலும் தமிழ் திரைப்பிரபலங்கள் கலந்துகொண்ட ‘தமிழ் மெகா ஸ்டார் கொண்டாட்டம்’ என்ற மாபெரும் நிகழ்ச்சி நடைபெற்றது.
‘மெகா ஸ்டார்’ கொண்டாட்டத்தை தொகுத்து வழங்கியவர் விஜய் டிவியின் தொகுப்பாளினி டிடி. நடிகர் டிங்குவின் தலைமையில் நடன நிகழ்ச்சிகள் அரங்கேற, சின்னத்திரை நட்சத்திரங்கள் ‘ஜோடி நம்பர் 1’ புகழ் ஆனந்தி, டிஜே பிரசாந்த் ஆகியோரும் கலந்து கொண்டனர்.
நடிகை நமீதா, நடிகர் நெப்போலியன், சின்னத்திரைப் புகழ் ரோபோ ஷங்கர் போன்றோர் கலந்து கொண்டு அமெரிக்க வாழ் ரசிகர்களை மகிழ்வித்தனர்.
தேவிஸ்ரீ பிரசாத்தின் இசை நிகழ்ச்சியை தொகுத்து வழங்க டிடி, அப்படியே தன்னுடைய தேனிலவு சுற்றுலாவையும் (ஹனிமூன்) திட்டமிட்டிருந்தார்.
அதே கையோடு ‘மெகாஸ்டார்’ நிகழ்ச்சியையும் தொகுத்து வழங்க வந்தார் டிடி. ஆனால் மேடையில் டிடி போட்ட குத்தாட்டம் மிகவும் சிறப்புமிக்கது என்கின்றனர்.
சின்னத்திரை நட்சத்திரங்கள் உயிரைக் கொடுத்து நடனமாட, மேடையில் அலங்கார அணிவகுப்பு (கேட் வாக்) சென்று ரசிகர்களிடம் கைத்தட்டல் வாங்கிவிட்டாராம் நமீதா.
