ஓஸ்லோ, டிசம்பர் 8 – இந்த முறை அமைதிக்கான நோபல் பரிசு பெறவிருக்கும் இந்தியரான கைலாஷ் சத்யார்த்தி, தனது பரிசைப் பெறுவதற்காக இன்று நோர்வே நாட்டின் ஓஸ்லோ நகர் சென்று சேர்ந்துள்ளார்.
நோர்வே நாட்டின் நோபல் பரிசளிப்புக் குழுவின் தலைவரான தோர்ப்ஜோர்ன் ஜக்லண்ட் ஓஸ்லோ விமான நிலையத்தில் கைலாஷ் சத்யார்த்தியை இன்று வரவேற்றார்.
நோபல் பரிசளிப்பு விழாவும் அதனைத் தொடர்ந்து விருந்து நிகழ்ச்சியும் எதிர்வரும் டிசம்பர் 10ஆம் தேதி ஓஸ்லோவில் நடைபெறும்.
கைலாஷூடன் இந்த ஆண்டுக்கான நோபல் பரிசைப் பகிர்ந்து கொள்பவர் பெண் உரிமைக்காகவும், கல்விக்காகவும் தலிபான் அமைப்புக்களுடன் போராட்டம் நடத்தி வரும் பாகிஸ்தானின் இளம் பெண் மலாலா யூசோப்சாய் ஆவார்.
படங்கள்: EPA
