புதுடெல்லி, பிப்ரவரி 10 – டெல்லி சட்டப்பேரவை தேர்தலில் பதிவான வாக்குகள் இன்று எண்ணப்படுகின்றன. 70 தொகுதிகளுக்கு கடந்த 7-ஆம் தேதி நடத்தப்பட்ட தேர்தலில் பதிவான வாக்குகளை எண்ணும் பணி 14 மையங்களில் நடைபெறுகிறது.
வாக்கு எண்ணும் மையங்களில் பலத்த பாதுகாப்பு போடப்பட்டுள்ளது. காலை 8 மணிக்கு வாக்கு எண்ணிக்கை தொடங்குகிறது. 10 மணி முதலே முன்னணி நிலவரம் தெரியவரும் என எதிர்பார்க்கப்படுகிறது.
முடிவுகள் 1 மணிக்கு மேல் தெரியவரும். 66 பெண்கள் உட்பட மொத்தம் 673 பேர் தேர்தல் களத்தில் உள்ளனர். இந்த தேர்தலில் ஆம் ஆத்மி கட்சி அதிக இடங்களில் வெற்றி பெற்று மீண்டும் ஆட்சியைக் கைப்பற்றும் என கருத்துக்கணிப்புகள் தெரிவித்துள்ளன.
அதே நேரத்தில் கருத்துக்கணிப்புளை தேர்தல் முடிவுகள் பொய்யாக்கும் என பாரதிய ஜனதா நம்பிக்கை தெரிவித்துள்ளது. இதனால் டெல்லி தேர்தல் முடிவு பெரும் எதிர்பார்ப்பை ஏற்படுத்தி உள்ளது.
