கோலாலம்பூர், ஏப்ரல் 27 – மலேசியாவின் உலகப் புகழ்பெற்ற பூப்பந்து விளையாட்டாளர் டத்தோ லீ சோங் வெய் மீதான ஊக்கமருந்து வழக்கின் முடிவு இன்று மதியம் 3 மணியளவில் அறிவிக்கப்படும் என எதிர்பார்க்கப்படுகின்றது.
இது குறித்து இளைஞர் மற்றும் விளையாட்டுத்துறை அமைச்சர் கைரி ஜமாலுதின் தனது டிவிட்டர் பக்கத்தில் வெளியிட்டுள்ள பதிவில், “இன்று மதியம் 3 மணியளவில் லீ சோங் வெய்யுடன் பத்திரிக்கையாளர்களை சந்திக்கின்றேன். அந்த சந்திப்பில் லீ சோங் வெய்யின் எதிர்காலத்தை அறிவிக்கப்போகின்றேன்” என்று குறிப்பிட்டுள்ளார்.
கோப்பன்ஹேகன் நகரில் கடந்த ஆண்டு ஆகஸ்ட் மாதம் நடைபெற்ற உலக சாம்பியன்ஷிப் போட்டியில் பங்கேற்ற சோங் வெய் பின்னர் ஊக்க மருந்து பரிசோதனையின் போது சிக்கினார்.
தடை செய்யப்பட்ட ‘டெக்சாமிதாசோன்’ என்ற மருந்தை பயன்படுத்திய காரணத்தால், 32 வயதான அவருக்கு 2 ஆண்டு தடை விதிக்கப்பட்டுள்ளது. இதை எதிர்த்து மேல் முறையீடு செய்துள்ளார் சோங் வெய்.
முடிவு தனக்கு பாதகமாக அமையும் பட்சத்தில் தான் விளையாட்டிலிருந்து ஓய்வு பெறப் போவதாக லீ சோங் வெய் அறிவித்திருந்தார் என்பது குறிப்பிடத்தக்கது.
