லாஸ் வேகாஸ், மே 5 – மிகவும் எதிர்பார்க்கப்பட்ட உலக சாம்பியன் வெல்டர்வெயிட் குத்துச்சண்டை போட்டியில் அமெரிக்க வீரர் ஃப்ளோயிட் மேவெதர் சாம்பியன் பட்டம் வென்று, 200 மில்லியன் அமெரிக்க டாலர் பரிசு பெற்றார்.
இந்த நூற்றாண்டின் சிறந்த போட்டி என வர்ணிக்கப்பட்ட, பிலிப்பைன்ஸ் வீரர் மேனி பேகியோ-வுடனான விறுவிறுப்பு நிறைந்த போட்டியில் மேவெதர் வெற்றியை வசமாக்கினார்.
அமெரிக்காவின் லாஸ் வேகாஸ் நகரில் நடைபெற்ற சவால் நிறைந்த பத்து சுற்றுகளின் முடிவில் மேவெதர் வெற்றி பெற்றதாக நடுவர்கள் அறிவித்தனர்.
இதன் மூலம், 38 வயதாகும் மேவெதர் வர்த்தக ரீதியிலான குத்துச்சண்டை போட்டியில் தொடர்ந்து 48-ஆவது வெற்றியை ஈட்டினார்.
வர்த்தக ரீதியிலான போட்டிகளில் இதுவரை தோல்வியே சந்திக்காதவர் என்ற பெருமையை தக்க வைத்துக் கொண்ட மேவெதருக்கு 200 மில்லியன் அமெரிக்க டாலர் பரிசுத் தொகையாக வழங்கப்பட்டது.
இரண்டாம் இடம் பிடித்த பிலிப்பைன்ஸ் வீரர் மேனி பேகியோ-வுக்கு சுமார் 145 மில்லியன் அமெரிக்க டாலர் பரிசுத்தொகையாக வழங்கப்பட்டது குறிப்பிடத்தக்கது.
