சென்னை, மே 7 – நேற்று முன்தினம் நெஞ்சுவலி காரணமாக டெல்லி தனியார் மருத்துவமனையில் அனுமதிக்கப்பட்டிருந்த பிரபல திரைப்பட இயக்குனர் மணிரத்னம் (59) தற்போது நலமாக உள்ளதாக அவரது மனைவி சுஹாசினி மணிரத்னம் தகவல் தெரிவித்துள்ளார்.
தனது டுவிட்டர் பக்கத்தில் கணவர் மணிரத்னத்துடன் எடுத்துக் கொண்ட தம்படம் (செல்ஃபி) ஒன்றை பதிவிட்டுள்ள சுஹாசினி, “நாங்கள் நலம்” என்று அதில் குறிப்பிட்டுள்ளார்.
இந்நிலையில், மணிரத்னம் தனது புதிய படத்திற்கான திரைக்கதையை எழுதத் தொடங்கியுள்ளதாகவும் சுஹாசினி தெரிவித்துள்ளார்.
