ஜார்ஜ் டவுன் – சிவப்புச் சட்டை அமைப்பினரிடமிருந்து பல்வேறு மிரட்டல்கள் வந்தாலும் கூட, பெர்சே 5 பேரணி கண்டிப்பாக நடக்கும் என்று பெர்சே தலைவர் மரியா சின் அப்துல்லா தெரிவித்துள்ளார்.
எனினும், பெர்சே பேரணி நடைபெறவிருக்கும் இடம் குறித்து சரியான நேரம் வரும் போது மட்டுமே பொதுமக்களுக்கு தெரிவிக்கப்படும் என்றும் அவர் குறிப்பிட்டுள்ளார்.
“திட்டமிட்டபடி பேரணியை நடத்துவோம். நமக்கென்று தனியாக ஒரு பாதுகாப்புக் குழு இருக்கின்றது. பேரணி அமைதியாக நடைபெற காவல்துறையிடமிருந்தும் நாம் உதவியைப் பெறுவோம் என்று நம்புகிறோம்” என்று மரியா தெரிவித்துள்ளார்.
நவம்பர் மாதம் நடைபெறவிருக்கும் பெர்சே 5 பேரணியை நிறுத்தக் கூறி, சிவப்புச் சட்டை அணியினர் தொடர்ந்து மிரட்டல் விடுத்து வருவதாக பெர்சே கூறுவது குறிப்பிடத்தக்கது.
