கோலாலம்பூர்: மலேசிய இளம் நாடாளுமன்ற உறுப்பினர் பி.பிரபாகரன், தனது தொகுதிக்கான முழு தவணையையும் மக்களுக்கு சேவை செய்ய இருப்பதாக தெரிவித்துள்ளார்.
சில அரசு சாரா நிறுவனங்கள் அந்த தொகுதியை காலி செய்யுமாறு கோரிய சில நாட்களுக்குப் பிறகு, அவரது காரின் மீது முட்டைகள் வீசப்பட்டன. அழுத்தமான மற்றும் நீண்டகால பிரச்சனைகளைத் தீர்க்க உதவும் வகையில் தனது கடமைகளைச் செய்யாமல் தனது வாக்காளர்களை தனிமையில் விடப்போவதில்லை என்று பிரபாகரன் கூறினார்.
“அண்மையில் முட்டை எறிந்த சம்பவம் என்னை விலகச் சொல்லும் அழைப்புகளுடன் இணைக்கப்பட்டதா என்பது எனக்குத் தெரியவில்லை. ஆனால், நாடாளுமன்ற உறுப்பினராக எனது கடமைகளை நிறைவேற்றாமல் எனது மக்களை இடையிலேயே விட்டுவிடுவது மிகவும் பொறுப்பற்றது” என்று அவர் கூறினார்.
23 வயதான பிரபாகரன் இது தொடர்பாக தமது ஆதரவாளர்களிடமிருந்தும் கருத்துக்களைப் பெற்றார். அந்தத் தொகுதியைக் காலி செய்ய அரசியல் ரீதியாக ஊக்கப்படுத்தப்பட்ட அழுத்தங்களுக்கு அடிபணிய வேண்டாம் என்று அவர் கேட்டுக் கொள்ளப்பட்டுள்ளார்.
“உண்மையான ஜனநாயக நடைமுறைகளை பாதிக்கும் இத்தகைய எதிர்மறை முன்னேற்றங்கள் குறித்து அவர்கள் ஏமாற்றத்தை வெளிப்படுத்தியுள்ளனர். இருப்பினும், எனது தலைவிதியை பிகேஆர் தலைமையிடமே விட்டு விடுகிறேன்,” என்று அவர் கூறினார்.
கடந்த 2018-இல் பிரபாகரன் சுயேச்சையாக போட்டியிட்டு, பின்னர் பிகேஆரில் இணைந்தார்.
அடுத்த ஆண்டு மார்ச் மாதத்திற்குள் பத்து திடீர் வெள்ளமில்லாமல் இருப்பதை உறுதி செய்வதற்காக வெள்ளத் தடுப்பு திட்டத்தை பிரபாகரன் முன்வைத்துள்ளார்.
“இதுவரை, நான்கு முக்கியமான மண்டலங்களில் திடீர் வெள்ள துயரங்களைத் தீர்க்க நான் உதவியுள்ளேன். கடந்த 20 ஆண்டுகளில் வெள்ளத்தால் பாதிக்கப்பட்ட பாசார் பெக்கான் பத்து, கடந்த ஆறு மாதங்களாக வெள்ளம் இல்லாமல் இருக்கிறது.”
“செலாயாங் மொத்த சந்தையில் நீண்டகாலமாக வெளிநாட்டு வியாபாரிகளின் பிரச்சனையை தீர்க்கவும் நான் உதவியுள்ளேன்,” என்று அவர் கூறினார்.
பொருளாதார நடவடிக்கைகளை அதிகரிப்பதற்கும் சுற்றுலாப் பயணிகளை ஈர்ப்பதற்கும் சீனா டவுன் திட்டமும் உள்ளதாக அவர் கூறினார்.
“இது பெட்டாலிங் தெருவைப் போலவே இருக்கும், நாங்கள் இப்பகுதிக்கு சிவப்பு வண்ணம் தீட்டுகிறோம்,” என்று அவர் கூறினார்.
நேற்று ஞாயிற்றுக்கிழமை, பத்து நாடாளுமன்ற உறுப்பினர் பதவியில் இருந்து விலகுவதற்கான சமீபத்திய அழைப்புகளுடன், முட்டை வீச்சு சம்பவம் தொடர்புடையதாக இருப்பதற்கான சாத்தியக்கூறுகளை காவல் துறையினர் நிராகரிக்கவில்லை என்றும், இந்த வழக்கு இன்னும் விசாரணையில் உள்ளதாகவும் கோலாலம்பூர் காவல் துறைத் தலைவர் டத்தோஶ்ரீ மஸ்லான் லாசிம் தெரிவித்தார்.
