புதுடெல்லி, மே 1 – நாடாளுமன்ற தேர்தலின் 7-வது கட்டமாக 7 மாநிலங்கள், 2 யூனியன் பிரதேசங்களில் உள்ள 89 நாடாளுமன்ற தொகுதிகளில் நேற்று தேர்தல் நடந்தது. அதிகபட்சமாக மேற்கு வங்கத்தில் 81.35 சதவீத வாக்குகள் பதிவானது.
ஏற்கனவே 6 கட்டங்களாக 349 தொகுதிகளுக்கு வாக்குபதிவு நடந்து முடிந்துள்ள நிலையில், நேற்று 7வது கட்டமாக மொத்தம் 89 தொகுதிகளில் தேர்தல் நடந்தது. காலை 7 மணி முதல் மாலை 5 மணி வரை வாக்குப்பதிவு விறுவிறுப்பாக நடந்தது.
குஜராத்தில் மொத்தமுள்ள 26 நாடாளுமன்ற தொகுதிகளில் நேற்று ஒரே கட்டமாக நடந்த தேர்தலில், 62 சதவீத வாக்குகள் பதிவானது.
பஞ்சாப்பில் உள்ள 13 நாடாளுமன்ற தொகுதிகளுக்கும் நேற்று ஒரே கட்டமாக நடந்த தேர்தலில் 73% வாக்குகள் பதிவானது. மேற்கு வங்கத்தில் உள்ள 9 தொகுதிகளில் நேற்று 3வது கட்டமாக நடந்த தேர்தலில், 81.35% வாக்குகள் பதிவானது.
ஜம்மு காஷ்மீரின் ஸ்ரீநகர் தொகுதியில் 25.62 சதவீத வாக்குகள் பதிவானது. தத்ரா மற்றும் நாகர் ஹவேலி யூனியன் பிரதேசத்தில் 85%வாக்குகளும், டாமன் டையு பகுதியில் 76% வாக்குகளும் பதிவாகின.
