ஜெயபுரா, ஆகஸ்ட் 17 – விபத்திற்குள்ளானதாக நம்பப்படும் இந்தோனேசிய விமானம் டிரிகானா ஏரில், கிழக்கு மாகாணங்களில் உள்ள ஏழை மக்களுக்கு வழங்குவதற்காக 6.5 பில்லியன் ரூபியா ( 1,883,424 மலேசிய ரிங்கிட்) பணம் இருந்ததாக அந்நாட்டு தபால்துறை அதிகாரிகள் தெரிவித்துள்ளனர்.
ஜெயபுரா தபால் அலுவலகத்தின் தலைவர் ஹர்யோனோ கூறுகையில், அந்தப் பணத்தை 4 பாதுகாவலர்கள் கொண்டு சென்றதாகவும், அந்தப் பணம் நான்கு பைகளில் இருந்ததாகவும் தெரிவித்துள்ளார்.
இந்நிலையில், விமானத்தின் பாகங்கள் கண்டுபிடிக்கப்பட்டதாகக் கூறப்படும் மலைப் பகுதிகளில் தற்போது மீட்புப் படையினர் தேடுதல் வேட்டை நடத்தி வருகின்றனர்.
நேற்று ஞாயிற்றுக்கிழமை மதியம், 54 பயணிகளுடன் ஜெயபுரா விமான நிலையத்தில் இருந்து ஆக்சிபில் நோக்கிப் புறப்பட்ட திரிகானா ஏடிஆர் 42-300 என்ற அந்த விமானம் தரையிறங்குவதற்கு 10 நிமிடங்களுக்கு முன்னர் விமானக் கட்டுப்பாட்டு அறையுடனான தொடர்பில் இருந்து விலகியது குறிப்பிடத்தக்கது.
